9 سنوات على قهر الريال: الأهلاوية يستعيدون ذكريات صنداي في مواجهة فيجو وزيدان

[ahstarsat]

استمراراً لخدمة نبض الجماهير والتي لاقت استحساناً وقبولاً كبيراً لدى زوار الموقع، ينقل لكم El-Ahly.com ذكريات بعض جماهير الأهلي حول اللقاء التاريخي والذي جمع نادي القرن بأفريقيا ونادي القرن بأوروبا ريال مدريد،وهو اللقاء الذي أقيم في مثل هذا اليوم الرابع من أغسطس عام 2001، والذي انتهى بفوز المارد الأحمر بنتيجة 1-0 أحرزه اللاعب النيجيري صنداي.

في البداية يتذكر نور المصري المباراة قائلاً :" ذكريات جميلة جدا وفى اليوم دة اتهمونى انى مجنون لأنى كنت متوقع الفوز ودة بامر الله الى حصل"، وأشاد Usama Ahmed بلاعبي الأهلي حينها قائلاً :"كان فى ساعتها شوية لاعيبة جامدة اخر حاجة وفى عزها خالد بيبو و وائل رياض كانو نجوم وكان عمارة وياسر رضوان وابو مسلم وحسام غالى وابراهيم سعيد ووائل الناس دية كانت فى عزها"، وتغزل العضو Mohammed Darhos بحسام غالي حيث قال :" مباراة للتاريخ مباراة كانت ومازالت عالقة بالاذهان مباراة قمة الروعة والاثارة وقمة المهارة ايضا من الغالي على قلوبنا حسام غالي مباراة لا تنسى وجيل ايضا لا ينسى ودايما يا أهلى مشرفنا ورافع راسنا"، وعلق Ahmed Gawish :" مش هنسي تسديدة كارلوس علي الحضري وكان في كورة في العارضة للاهلي دة غير طبعا جون بتاع صنداي والشقلبظات اللي عملها بعد الجون"

وتحدث Amr Adel قائلاً :" انا فاكر الماتش دة كان كل الناس بتقول يارب نشيل 3 صفر بس و اول ما الماتش ابتدى شوفنا حاجات مش متوقعة لاقيت الاهلي كان مكسر الدنيا وكان ماتش عالمي بيبو حسام غالي كانوانجوم الماتش"، وأضاف Karim Mohamed :" انا كنت صاحى من الساعة 9 الصبح عمال اجهز فى كل حاجة علشان ده كان يوم عيد بالنسبة للاهلوية وجبت صواريخ وجهزت الفيديو علشان اسجل الماتش ومازال لحد الان الماتش متسجل عندى شريط فيديو"، وتحدث Ahmed El-Sawy :"الأهلي كان عامل مسابقه مع الأهرام وجوايزها انك تكسب تذاكر الماتش وانت علي الخط وفعلا إتصلت مره ومن كتر مافرحت اني كسبت روحت إتصلت تاني عشان احاول أعرف تفاصيل أكتر وكسبت تاني وروحت إستلمت التذكرتين وروحت علي الإستاد من ...الساعه 12 الظهر مع العلم بإن الماتش كان الساعه 9 بالليل وكان يوم رائع وخصوصا ماتش القدامي ومش هانسي لما كل الستاد قعد ينده بيب بيب بيب .. إنزل يا خطيب عشان ماكانش فالتشكيل وفعلا نزل هو وطاهر أبو زيذ حتي طاهر شاط فاول زي اللي كان جابه فالمغرب سنه 86 شاطها من نفس المكان بس الكوره طلعت بره بفرق سم يعني"

وقال Moaz Elhakim :" اول لمسه لوائل جمعه قولت ايه القرف ده..وكنت قرفان بس بعد الماتش عرفت انه هيبقى نجم والحمد لله قد كان"، وأضاف حسن حسين :" انا حضرتها فى الإستاد وكانت الأجواء رائعة جدا والإحتفال اللى سبق المباراة باللاعبين القدامى للأهلى كان جميل ومشرف وطبعا الخطيب كان له نصيب الأسد فى الهتافات ويليه احمدشوبير اللى كان لسة محبوب من كل جماهير الاهلى" وعلق Sherif Fouda :" ليا ذكرى مع واحد صاحبى كان زمالكاوى وساعتها قولتله يابنى شجع الاهلى احسن علشان صحتك قالى لو الاهلى كسب النهارده ريال مدريد هشجع الاهلى بعد كدة ومن ساعتها بيشجع الاهلى"، واضاف Ahmed Osman :" كان ماتش حلو اوى تانى يوم كنت هترفد من الشغل كنت مستلم الشغل جديد و صادف اننى مخلص كل شغلى يومها ورحت فاتح الورد ارت و كاتب الاهلى 1 ريال مدريد صفر بسلى هوب لقيت ايد على كتفى بابص لقيت مدير عام الشركه قالى ايوة احنا فرحانين ان الاهلى كسب بس الكلام على ع القهوة مش ف المكتب"

وأضاف Walid Zakria :" المباره ديه كانت الساعه 9.00 تقريبا و انا فاكر باب الاستاد مفتوح من الساعه 1.00 ظهرا فى اليوم ده انتظرنا فى الاستاد اكتر من 7 ساعات و الساعه 5.30 نزلو براعم الاهلى و لعبو مع مباريات كتيره ثم مباره بين لاعبى الاهلى القداما - الخطيب و طاهر و اكرامى و تم تكريم قداما الاهلى فى هذه المباره ثم القاء المنتظر مباره فى غاية الروعه"، وشدد مروان نور ابو تريكة على قيمة الفريقين حيث قال :" اندية القرن بتلعب مع بعضيها"، وأضاف Hema Bauomy UA :"بصراحة كان يوم جامد الواحد كان مبسوط أوي وقتها، وكان نفسي يخلص اكتر من 1-0، بس حسام غالي كان مجرم في المتش ده"