جروحى تنزف احزان

[ساهر سات]

فهد :"مبروك ياعريس "
خالد : "الله يبارك في عمرك ...عقبالك .."
فهد : "لا توني ابغى استمتع في حياتي ...خلك انت يالمسكين...وبعدين يااخي ابتسم شوي ياللطيف شكلك يخرع لا تدخل عليها كذا تنتحر البنيه ... "
خالد :هههههههههههه وهذي ضحكه علشانك ..."
ناصر :" مبروك ياعريس .."
خالد : "الله يبارك فيك ..."
ناصر : "اكيد الحين تبي تدخل تشوف بعض الناس ..."
فهد : "انا اش مقعدي بجنبه ...اخاف من كثر الشوق يفضحنا ويدخل حتى بدون اذن صاحب البيت ..."
خالد : "ههههههههه افضحكم ها ...اشوف فيك يوم ياولد عمي ..."
فهد : "هههههههههه اذا مثل يومك الله يسمع منك ..."

^^^^^^^^^^^^^^^^^^^^^^^^^^

اول مادخلت الكل انبهر من جمالها ونعومتها...وكان الحيا اللي يطل من عيونا يزيدها جمال على جمالها ....اول ما جلست راحت ام خالد و بدريه وساره يسلمون عليها ويباركون لها ...بدريه كانت فرحانه واللي كدر فرحتها شوفتها لعبير وامها اللي من الحظور...
عبير كانت نظرات الغيره تطل من عيونها ...
عبير : ريم حرام عليك ذي موحلوه وبس الا ملكة جمال ...
ريم :بس انتي احلى
عبير بفخر : اكيد انا احلى ....بس ما توقعتها بهالجمال ...
ريم : أي جمال واللي يعافيك وانا مااشوفه ..
عبير:واضح من بيتهم ان حالتهم الماده ضعيفه"
ريم:"ايه...ماادري اشلون عايشين"
عبير:"احس بيتهم يشبه بيت اختك بدريه"
ريم :"حرام عليك بيت بدريه "
عبير مقاطعه:"انا اقول الحقيقه الظاهر اهلك مايهتمون في الحاله الماديه....كان ابوك مازوج عبد الله....ولا خطب لخالد من هالبيت"
ريم:"ترى عبدالله حالته الماديه ماعليها جيده"
عبير حبت تغير الموضوع:" خالداكيد بيدخل ..."
ريم : "ماادري ...بس انت اشلون اقتعتي امك تجين"
عبير:"تعبت الين اقتنعت واكثر شي خلاها توافق لما درت ان الملكه عائليه وما فيه احد"

^^^^^^^^^^^^^^^^^^^^^^^^^^^^^^

رهف كانت عند بسمه وتسولف معها ...
رهف :" تبغين تشوفين عبير ...اللي كانت خطيبة خالي خالد "
بسمه : "ايه ابغى اشوفها ..."
رهف : "شوفيها اللي قاعده مع خالتي ريم ولابسه اسود ..."
رفعت نظرهها والتقت نظراتهم وشافت نظرات حقد وغيره ...قالت في خاطرها بعذره يحبها عمري ماشفت احلى منها .......
امابدريه كانت ما تبغى خالد يدخل عند الحريم بسبب وجود عبير اللي اكيد ماراح يحلى لها السلام على بسمه الا لما يكون خالد بجنبها عشان كذا نسقت مع ام عبد العزيز انهم يدخلون بسمه المجلس الصغير ويدخل خالد هناك من غير ما يمر على الحريم .....

[ساهر سات]

-"تصدق ياخالد اليوم اسعد يوم في حياتي ..."
ابتسم خالد لابوه: "اسعد من يوم تزوجت المزيونه امي ..."
ابو خالد : "اسعد بكثييييير..."
خالد :" طيب واللي يعلم امي .".
ابو خالد :" افا عليك وانا ابوك ...بعدين تعال انت محد يمزح معك ..."
خالد :ههههههه...
جاهم ابو عبد العزيز :"خلاص يابو خالد اذا بيدخل خالد ..."
خالد في خاطره ومنسق لكل شي يابو خالد انا اشهد انه اسعد يوم في حياتك...
ابو خالد :" يالله ياخالد ندخل ..."
ابو عبد العزيز :بيدخل معك عبد العزيز لان اهلك عند بسمه وما ابغى اضايقهم ...
وهو في الطريق حاس بتوتر ويحاول يتظاهر بالفرح عشان اللي حوله....
اول ما دخل ما شافها لانه كان يمشي ورى ابوه اللي مغطى عليهاوخواته اول ما شافوه قاموا يسلمون عليه ويباركون له الاريم اللي قاعده تراقب....
يوم التفت عليها كان ابوه سلم عليها وجلس ..ما توقعها بهالجمال ...قرب منها وكانت منزله راسها للارض مد يده لها ...
-"مبروك ..."
بسمه : "الله يبارك فيك ..."
جلس بجنبها وهو لازل ماسك يدها وهي مستحيه ...انتبه وفك يده....
رهف :" احلى ثنائي قد شفتهم في حياتي ...."
ابو خالد وهو مبتسم :" انا اشهد انك صادقه..."
مازن : "انا زعلان منك يابسمه ....."
بسمه وهي تناظره بحنان :"ليش ..."
مازن : " كنتي خطيبتي ليش توافقين على خالي ..."
بسمه :" انت ماخطبتني ...الظاهر ما اعجبت امك ..."
ابو خالد: "لو ما اعجبتيها ماكان ...خطبتك لخالد ...."
استحت يوم رد ابوخالد ....
ابو خالد :" ياللا انا استئذن وانتو بعد خلو العرسان يجلسون لوحدهم شوي ..."
ابتسم لبسمه : "مبروك يابنيتي ....صادقه بدريه يوم تقول تدخلين القلب من نظره...."
وطلع وهو حاس بسعاده ...
انتبه خالد لريم اللي قاعده وساكته:"اشفيك ياريم حتى مبروك ما سمعتها منك ..."
ريم بدون نفس : "مبروك ..."
خالد : "اشين مبروك سمعتها اليوم .."
امل :"ما عليك منها ياخالي ....شكل فيها النوم ..."
ريم :" لا مافيني نوم بس متضايقه من ناس ما احبهم"
بسمه حست انها المقصوده ياربي اش بيني وبينها حتى تعاملني بهالطريقه ...
رهف :"لاتنسى ياخالي اللي وعدتني ..."
خالد وهو يفكر : "أي وعد ذكريني ..."
رهف :" مسرع نسيت ما عليه اذكرك ...البنت الاولى اسمها رهف ....عشان نناديك ابو رهف ..."
انحرجت بسمه انتبه خالد وحب يحرجها زياده ...
خالد:" ههههههه خلي البنت تجي اول وعقب يصير خير..... بس ان شاء الله تطلع حلوه على امها ..."
بسمه انقهرت من اسلوبه اللي يبغى يحرجها وهي مهي ناقصه ...
امل :" المهم خالي ما اوصيك على بسمه تراها غاااااااااليه..."
رهف :" وانا بعد ما اوصيك عليها .."
خالد :"لا توصون حريص ....بس عاد احد يوصيها علي ..."
ام خالد : "انا اوصيها عليك ....ترى يابسمه ولدي غالي علي بالحيل ....ياويل اللي يزعله..."
حس خالد ان كلامات امه قاسيه شوي
بسمه :"الله لا يجيب الزعل ياخالتي ..."
بدريه :"عاد انا يمه اسمحيلي بوصي خالد ( وهي تناظر بسمه بحنان )تراها ياخالد بنتي وبغلات امل ورهف عندي ...ياويلك لو زعلتها ..."
بسمه لما سمعتها تقول كذا نزلت راسها ومسحت دمعه حاولت تخفيها عن الجميع
الوحيد اللي انتبه لها هوخالد...
خالد :" اشفيكم اليوم شغالين تهديد ...عموما حاظر عمتي بنتك في عيوني ..."
ساره : "انا عاد اوصيكم اثنينكم على بعض .."
خالد :"هههه هذا الكلام الزين ..."
ريم وهي طالعه : "انا بطلع لاني احس الجو مخنوق هنا ..."
بدريه : "احنا جميع بنطلع معك لا يخنقنا خالد ..........."
خالد :"هههههه من يومك ذكيه يابدريه ...."
وهم طالعين كانت امل بجنب بسمه اللي مسكت يدها ....بس امل فكت يدها بهدوء وطلعت معاهم ...
كانت بسمه منزله راسه وتناظر الارض خاصة وهي حاسه انه قاعد يراقبها ...
كان خالد مهو عارف اش يقول بس لازم يتكلم ... وهو في خاطره لو عبير ماكان قعدت
ساكت ماني عارف اش اقول بس انا لازم احاول انساها ....(وهو يتأمل بسمه )اش ذنب بنت الناس اظلمها معاي ...
خالد :"اشلون الدراسه معاك ...(حس انه سؤاله تافه)"
بسمه : "تمام ..."
خالد :" اش مسويه لبدريه وبناتها اللي يموتون فيك ..."
بسمه :" اللي مسويه انت لهم ...."
خالد :" فيه شي في الارض؟؟ "
بسمه باستغراب :"في الارض..."
خالد : "ايه اشوفك ما رفعتي نظرك عن الارض من يوم دخلت ....لا يكون في عيونك عيب ما تبغيني اشوفه ...."
رفعت عيونها والتقت نظرات عيونهم على طول استحت ونزلت نظرها ...لانه من دخل وهي تتحاشى النظر له ....
قعد يسولف معها شوي بعدين استئذن وطلع ...

^^^^^^^^^^^^^^^^^^^^^^^^^^^^^^

[ساهر سات]

هند :"الله ....ياهدى... عمري ما شفت رجال في حلاته..."
هدى : "وانتي وين شفتيه ..."
هند : "وهو طالع من عند بسمه .....توقعت يطلع والضحكه تشق الوجه ...بس كان مهو مبين هو فرحان ولا زعلان ..."
هدى : "عرفت من مصادري الخاصه انه يموت في بنت خالته عبيراللي كانت خطيبته ...بس ما صار نصيب..."
هند :" صدق ... ياليتني اشوف هالعبير ....."
هدى : "جات اليوم ما شفتيها ..."
هند : "لا ما شفتها اوصفيها لي يمكن ا تذكر شكلها.........."
هدى :"من غير ما اوصفها لك... من احلى وحده اليوم ؟؟"
هند وهي تفكر : "اللي لابسه اسود ...بصراحه تاخذ العقل ..."
هدى :"هههههههه هذي الله يسلمك اللي ماخذه عقل رجل بنت عمك ...."
كانت في غرفتها وتفكر في احداث اليوم وتفكر في خالد .... اللي صار زوجها ...
خالد اكيد كل بنت تتمناه وماكانت تحلم ولو حلم انها تتزوج واحدمثل خالد.... المفروض انه تكون فرحانه....بس للاسف تحس بمشاعر كثيره الفرح مهو بينها كانت تحس بالخوف من حياتها مع خالد......بالحزن وبالحنين والشوق لاهلها تمنتهم يكونون معها في هاليوم ...

.
.
.
.

كان خالد في مكان ثاني يسترجع احداث اليوم اللي ماكان فيها شي سعيد في نظره الا الفرحه اللي شافها في عيون ابوه ....اما بسمه برغم جمالها ما حس ناحيتها باي شي وقال في خاطره انا لما حبيت عبير ما حبيتها لجمالها حبيت ذكرياتي معاها ورقتها ونعومتها حتى وهي طفله كانت الوحيده اللي احبها .... وبعد ما تعلقت فيها وحبيتها بكل ما فيها يضيع هالحب فجأة .......

[ساهر سات]

هذ الله يسلمكم كل اللي صار يوم الخميس "
كانت امل تحكي لصديقاتها عن يوم ملكة بسمه اللي انتشرت اخبارها بين صديقاتها في المدرسه....
دلال :" هذا الموجز وانت الصادقه ...نبغى الاخبار بالتفصيل"
بسمه :" الحين ساعه تتكلم وتقولين هذا موجز"
دلال وهي تناظر بسمه :" امل كيف كانت بسمه يوم دخل خالك ؟؟"
امل :" ههههههه تصدقين لو ما انا ساندتها كان اغمى عليها"
بسمه :" امل عن المبالغه"
ندى تبغى تقهر بسمه :" اقول امل خالك خالد هو نفسه اللي تقولين انه عايش قصة حب مع بنت خالته"
امل:" ايه هو نفسه ....بس من شاف بسمه صارت هي حبه الاول والاخير"
تنهدت بسمه بصوت غير مسموع وقالت في خاطرها ياحبك للمبالغات ياامل...
ندى :" الله يعينك الحين على مكالمات حتى اخر الليل ....تصدقين اختي خوله من ملكت وهي يوميا مكالمات الى اخر الليل "
دلال :" والله اختك قاعده في البيت ما عندها امتحانات بعد اقل من شهرين "
بعد ماراحوا صديقاتهم وما بقى الا بسمه وامل ودلال...
امل:"هالندى ماادري ليه ودي اكفخها..."
بسمه:"ههههههه هدي اعصابك ياعنتر زمانك"
دلال:"انتي شوفي الفرق بينكم وعقب كفخيها على راحتك"
امل:"ما تدرين يحط سره في اضعف خلقه"
بسمه:"والله انا اللي ودي اكفخك"
امل:"بسم الله علي....تبغين من الحين تظهرين سلطتك علي لانك مرة خالي"
بسمه:"تدرين ليه"
امل:"ماادري"
بسمه:"يوم الملكه جات عبير صح؟؟"
امل:"ايه...اش دراك؟"
بسمه:"ولا انتي ناويه تقولين لي"
امل:"اصلا الكل تفاجأ لما شافها وانا ماشفت داعي اعلمك"
بسمه:"وليه مافيه داعي"
امل:"انتي خلقه كنتي متوتره وحسيتك بتتوترين زياده لما تشوفينها"
بسمه:"حتى ولو المفروض انتي صديقتي وما تخبين علي شي"
امل:"الحين انتي ليش زعلانه"
بسمه:"لاني شفت عبير وغيرك كان قلبه علي وتولى هالمهمه"
امل:"اكيد الغبيه رهف"
بسمه:"حرام عليك رهف مهي غبيه"
امل:"طيب اشرايك في سؤالها لخالي "
بسمه:"يالله يا امل ماتتصورين اشكثر احرجني سؤالها"
دلال:"وهالفقيره اللي قاعده معكم فهموها عن اش تتكلمون"
امل:"هذا الله يسلمك رهف تذكر خالي بوعده لها ان اول بنت تجي له بيسميها رهف"
دلال:"ههههههه طيب اش كان رده"
بسمه:"بصراااااااااحه كان رده سخيف"
امل:"قال عساها تجي حلوه لامها"
دلال:"بالعكس رده مهو سخيف"
بسمه:"الا سخيف ومليون سخيف"
دلال:"ياللطيف شوفي وجهها اشلون صاير احمر"
امل :"ههههههه انتي لو شفتيها يوم الخميس...."
قاطعتها بسمه:"شوفي انتي وياها... غيروا الموضوع والا اقوم عنكم"
دلال:"هههههه خلاص نغيره....متى الزواج بيكون يامل؟؟؟
كانت بسمه بتقوم مسكتها دلال من يدها وهي ميته ضحك :"خلاص والله توبه"

[ساهر سات]

شفتي يمه .... الحين خالد متزوج ...والقهر ان زوجته حلوه "
ام عبير :" ما عليك من الحلى انتي احلى منها بكثير ....وبعدين يابنيتي حاولي تنسين خالد"
عبير :"مستحيل انسى خالد ومستحيل اخليها تتهنى فيه ...واللي يقهر الزواج بعد الامتحانات ...يعني باقي شهرين "
ام عبير :" يابنتي "
عبير:"تتعتقدين اني بسهوله بتخلى عن خالد"
ام عبير:"كل انسان ياخذ نصيبه"
عبير:"يمه انا اعض اصابع الندم لاني طعت ابوي في فسخ الخطبه"
ام عبير:"انا قلت لك...بس انتي ماطعتي"
عبير:"ماتوقعت يصير كذا"
ام عبير:"كنتي معتمده على حب خالد لك بس نسيتي ان خالد مستحيل يرفض لابوه طلب"
عبير:"ياكرهي لابوه هو السبب"
ام عبير:"عاد تصدقبن خالد لو يدري انك كنتي موافقه على فسخ الخطبه كان يكرهك عمره كله"
عبير:"مااحد يدري الاانتي وابوي ....انتبهي لما تسولفين مع خالتي"
ام عبير:"منتبه وصي انتي عمرك "
عبير:"لا انا حذره جدا مع ريم"
ام عبير:"عاد تصدقين الحين بعد مارجع محمد يمكن ترجع العنود ويزول الخلاف اللي صار"
عبير:"خربوا علي انا وخالد والحين يتصالحون"
ام عبير:"لو انتي وابوك ماتسرعتوا وفسختوا الخطبه كان الحين باقي انتي خطيبة خالد"
عبير بضيق:"يمه خلاص تسرعنا وانتهى...".
تحسرت ام عبير على حال بنتها اللي ومن يوم رجعوا من ملكة خالد وهي في غرفتها وحزينه ... ماهي مهتمه في دراستها ...
وقررت في نفسها تحاول هالزواج يفشل باي طريقه ....

^^^^^^^^^^

ما تدري هي تفرح باللي تسمعه ولا تحزن....كان ابوها يكلمها بهدوء وما ردت عليه لما سكت...
ابو فيصل:"ها... يالعنود اشرايك..."
العنود:" ماادري يبه اش اقول"
ابوفيصل:"منتي بصغيره حتى احد يقرر عنك هذي حياتك وحياة عيالك"
العنود:"محمد يبه اللي سواه مهو سهل مد يه علي وسمعني كلمة طالق وهو يرميني برى بيته"
ابو فيصل:"ماادري عنك هذي حياتك وانتي حره فيها"
العنودوهي تحاول تدور له عذر:"هو ماتغير الا الاشهر الماضيه ..."
ابو فيصل:"ومن اول كيف كان معك"
العنود:"نعم الزوج لي ونعم الاب لعياله ...بس مشى مع شلة فساد"
ابو فيصل:"طيب انتي فكري وعطيني رايك"
العنود:"اعتقد ان عشرة السنين الماضيه تشفع لمحمد اول غلطه مهما كانت كبيره"
ابو فيصل:"نعم الراي وانا ابوك"
العنود:"طيب يبه اكيد هو الحين صار طيب من اللى كان يتعاطاه"
ابو فيصل:"انا سألت عنه في المستشفى اللي كان فيه والحمد لله طلع صادق في اللي قاله"
العنود:"يارب يرجع محمد الاولي"
ابو فيصل:" عموما...انا مابرد عليه الحين فكري زين وردي علي"

[ساهر سات]

كانت غرفتها مقلوبه فوق تحت الكتب ولاوراق منتشره حولها ...
وهي مهي عارفه في أي كتاب تبدي ....
دخلت عليها سحر ...
سحر :" ها ...كيف المذاكره "
بسمه :" خليها على الله كل ما فتحت كتاب جاتني الافكار اشكال والوان "
سحر :" حاولي تركزين وانسي كل شي "
بسمه بحزن :" ما اقدر انسى ...اولا الزواج بعد الامتحانات بااسبوع ... والله ظلم كان خلوني ارتاح شوي "
سحر :" ههههههههه اش نسوي للمعرس اذا هو مستعجل"
بسمه : "أي مستعجل ....واللي يعافيك ....اللي من يوم الملكه لا مر ولا اتصل كانه مغصوب على هالزواج "
سحر :"اكيد ما يبغي يلهيك عن الدراسه ....وبعدين لايكون مشتاقه للحبيب "
بسمه :" انا عرفته عشان اشتاق له "
سكتت شوي وبتردد :" بغيت اكلمك في موضوع "
سحر بان الاهتمام في عيونها : "وانا اسمعك "
بسمه :"تدرين انه مافي وقت على الزواج وانا ماسويت شي و...."
سحر :" لا تشيلين هم انا كلمت ابوي....وبكره ان شاء الله بنروح عشان الفستان ....وكل يوم بنروح عشان شي ....عسى نخلص قبل الامتحانات.."
بسمه : "الله يخليك لي يااحلى بنت عم في الدنيا"
سحر :"على فكره بدريه كلمت امي بنروح لهم"
بسمه :"احسن خلي الواحد يغير جو"
سحر:"بيتنا وبيت بدريه جوه واحد بس الواحد يشوف وجيه جديده"
بسمه:"على قولتك وجوه جديده"

^^^^^^^^^^

وهي قاعده في غرفتها مع مشاعل ...بسولفون عن الجامعه وبنات الجامعه ...
مشاعل :" ها ....ريم ما رديتي علي في الموضوع اللي "
ريم مقاطعه :" ما اقدر "
مشاعل :" حاولي علشاني الله يخليك "
ريم :"لا تحرجيني "
مشاعل :" افا ...ياريم ما تخدميني هالخدمه "
ريم :" اف ...ياختي دوري غيري "
مشاعل :"مااقدر اقول لاي احد "
ريم :" ياربي ....طيب خليها بعد الامتحانات ويصير خير "
مشاعل :" توعديني ......."
ريم بضيق وعشان تفتك من الحاحها :" اوعدك ....".
مشاعل:"عبيييييير مره متأثره عقب ماملك اخوك"
ريم:"ايه...بس ما في يدنا شي نسويه"
مشاعل:"اشلون اخوك مع بسمه يزورها"
ريم:"ما يتكلم عنها ابدا واذا سألته مايرد علي"
مشاعل:"تتوقعين لازال يحب عبير"
ريم:"اكييييييييييد"

^^^^^^^^^^

[ساهر سات]

كان رايح لبدريه اللي من الملكه انشغل وما جا بيتها واكتفى بشوفتها في بيت اهله ...
وهومار من قدام بيت بسمه التفت عليه مايدري ليش خطرت على باله وتسأل اش قاعده تسوي هي الحين ....
اول ما دخل البيت كانت رهف طالعه برى ...
ابتسمت يوم شافته :" هلا بخالي الحبيب "
خالد :" اهلين رهوفه ....اش تسوين برى؟؟؟"
وقربت منه : "تدري من عندنا ؟؟؟"
خالد وهو رافع حواجبه :" لا ماادري ..."
رهف :" بسمه واهل عمها..."
خالد :" بسمه عندكم ..."
رهف :" ايه عندنا قاعده هي وامل فوق......... اش رايك نسوي لهم مفاجأه...ونطلع لهم ..."
خالد : "لا خليهم .....(وهو يفكر) ولا تدرين خلينا نطلع ...بس ماابغى احد يدري"
ما يدري ليش قرريطلع ...علشان بشوفها ولا علشان يحرجها ...ما يدري بس مشى ورى رهف على فوق...

^^^^^^^^^^

فتحت رهف الباب كانت امل على السرير و بسمه قاعده على الكرسي اللي مقابل
الباب وتلعب بشعرها ...اللي فكته وحطت اغلبه على وجهها ...لما شافت رجلين رهف
ما اهتمت واستمرت تحرك راسها يمين وشمال ...
بسمه :" تصدقين ....خاطري اقص شعري زهقت منه "
خالد :"ليش تقصينه ....انتي زهقتي منه غيرك ما زهق "
حست ان الدم نشف من عروقها....ويدينها صارت ثقيله تبغى ترفع شعرها ماهي قادره ...وكان قدامها خيارين اما تصيح من شدة الاحراج وتبان قدامه ضعيفه ولا تسوي نفسها ولا مهتمه ولا كأن صار شي ....اختارت الثاني وخلال هالوقت سلمت امل على خالها ورحبت فيه ...لما عدلت شعرها التفتت عليه ومدت يدها بتسلم عليه حست يده قويه وهي تشد على يدها ...
خالد وهويبتسم :" اشلونك بسمه "
بسمه :" الحمد لله بخير"
سكت خالد شوي :" وانا الحمد لله بخير "
ماردت عليه من الاحراج اللي حاسه فيه ....
خالد :" اقول كيف المذاكره ...اذا تبون أي مساعده انا مستعد"
امل بحماس :" ساعدنا في الانجليزي اللي..."
وسكتت لما شافت نظرات بسمه لها ...انتبه خالد لبسمه ...
سحب خالد الكرسي وجلس :" طيب ياامل ما عندكم عصير تكرمين فيه خالك"
امل وهي طالعه:" ههههه اكيد عندنا"
خالد وهو يطالع بسمه الواقفه :" تعالي اجلسي"
وقبل ماتجي قرب الكرسي بجنبه وجلست عليه ..

--------------------------------------------------------------------------------

[ساهر سات]

خالد :" اقول رهف ليش ماتروحين تذاكرين "
رهف :" ما عندي مذاكره "
خالد:"طيب ليه ماتروحين عند الحريم "
رهف:"زهق عندهم"
خالدبصوت واطي وسمعته بسمه :"اش يطلعها هالزقه"
خالد:"رهف حبيبتي شوفي في التلفزيون فيه مباراه اذا جات ناديني"
رهف وهي طالعه"طيب"
التفت خالد في بسمه اللي كانت تخطط على الهرب ....
رجعت رهف بسرعه:"خالي في اي قناه المباره"
خالد بضيق:"في قناة العربيه"
رهف:"خالي العربيه ماتجيب كوره"
خالد:"لا اليوم فيه مباره تنقلها العربيه اذا جات ناديني ولا توريني رقعة وجهك قبل ما تجي"
خافت بسمه يوم طلعت رهف بس من حسن حظها كانت طلعتها على دخلت امل
امل :" انا جيت"
خالد:"مشاء الله عليك في الوقت الماسب توها اختك طلعت"
امل:"عادي تبغوني اطلع ماعندي مشكله "
بسمه:"لااااا"
خالد:"ياليييييت"
كانت امل تشوف نظرات تهديد في عيون بسمه...
امل :"سووووري مادام مااتفقتوا اسوي اللي يريحني واقعد معكم"
قعد خالد وامل يسولفون مع بعض ويضحكون ...كانت بسمه تكتفي بالابتسام ...
ومر الوقت بسرعه وحست انها لازم تنزل تحت وهي في قلبها خايفه من ردة فعل عمها لو درى ان خالد كان موجود ...
بسمه :" يالله انا لازم انزل "
ونزلت بسرعه قبل ما تسمع ردهم...وهي في اخر الدرج سمعت صوت ابو مازن خافت ورجعت بسرعه....... وفي نفس الوقت كان خالد نازل واصطدمت فيه وكانت من اثر الصدمه راجعه ورى.... لكن خالد حط يده من ورى ظهرها علشان ما تطيح وقربها منه حتى صارت ملاصقه له....اول ما حست امل انها استعادت توازنها فكت يده من ورى ظهرها برفق وابتعدت عنه شوي ...
بسمه وهي مرتبكه :" اسفه ......."
خالد :" لا عادي ... اشفيك رجعتي "
بسمه :" سمعت صوت ابو مازن تحت"
خالد:"اوكيه اجل انا بنزل وعقب انتي انزلي"
ونزل خالد وهي تحس بالاحراج من الموقف البايخ اللي صار لها معاه...
نزلت عند بدريه ومرة عمها وبدريه وسحر(هند وهدى راحوا لبنات خالتهم)
وجلست بجنب سحر وكان باين عليها الارتباك...
سحر:"اشفيك شكلك موطبيعيه"
بسمه:"خليها على الله صار لي موقف"
سحر:"أي موقف"
بسمه:"بعدين اقولك"

^^^^^^^^^^^^^^

كانت رهف طالعه من المجلس على دخلة امل...
امل:"وين ابوي بسمه تقول سمعت صوته"
خالد:"طلع يبدل وبيجي اللحين "
امل :" انتي يالغبيه اشلون تدخلين خالي الغرفه من غير ما تقولين اول "
رهف ببرائه :"اشفيها ....زوجها "
خالد وهو مبتسم:"وهي صادقه (وهو يقلد رهف ) زوجها "
امل :" حتى ولو البنيه انحرجت "
خالد :" انا لو ابغى احرجها صدق كان علقت على شكلها اول مادخلت الغرفه ...
خرعتني "
امل :"حرااااام عليك ليش تبالغ "
خالد وهو يهز كتفه :" انا ما ابالغ ...انا اقول الصدق "
امل :" شو صدق بسمه في الجمال ماشاء الله عليها .... ما تقدر تتكلم "
خالد يبغى يقهرها :"اذا انتي تشوفينها جميله ....انا اشوفها اقل من عاديه "
امل وهي تقرب من خالها : "لا تقول كذا ....الله يخليك "
خالد :" وليش ما اقول ....وبعدين احسها ممله وما تعرف تقول كلمتين على بعض ...
وشخصيتها مهزوزه ....وتفكيرها محدود "
امل حست انه يبغى يقهرها :"كل هذا فيها ....انت اصلا قعدت معها حتى تعرف شخصيتها ....اللي حتى تلفون ما تكلمها "
خالد :" ليه شكت لك "
امل :" لا هي ما تقول بس انا لومكانها كان مت قهر "
خالد :" محد يموت ناقص عمر "
امل:" بصراحه نرفزتني اروح عند الحريم احسن لي"
بدريه :" اشفيكم ياكافي صوتكم واصل اخر الدنيا "
امل: "اسألي اخوك"
بدريه :"روحي داخل عند الحريم حتى اجي بعد شوي"
خالد :"هلا بدريه "
بدريه :" هلا فيك ...اشرايك ننادي لك بسمه تقعد معك شوي"
خالد:"ما قصرت رهف دخلتني عليها هي وامل"
بدريه:"حسبي الله على ابليس هالبنت ماادري متى بتعقل"
خالد:"ما سوت شي غلط لا تنسين ان بسمه مرتي"
بدريه:"حتى ولو يمكن عمها يزعل لو درى"
خالد:"انتي ماشفتي امل تو معصبه علي ليش ادخل"
بدريه:"عشان كذا صوتها كان عالي"
خالد : "ههههههه لا وقعدت اسب بسمه ....وهي ارتفع ضغطها "
بدريه :" حراام عليك "
خالد:"كنت ابغى اقهر امل"
بدريه:" طيب اش كان شعورك انت وهي لما شفتوا بعض"
خالد :"هههههه .... هي شوي وتصيح يوم شافتني "
بدريه :" وانت اش كان شعورك"
خالد وهو يتذكر :" عادي جدا "
بدريه :" خالد بعد فتره بتبدى الامتحانات رح رزها مره اقل شي اجبر بخاطر البنيه
حسسها باهميتها و عودها عليك "
خالد وهو يفكر:" يصير خير"

[ساهر سات]

عبير :" قلت لك يبه ما ابيه ""
ابو محمد :" الرجال ما ينرد ليش ترفضينه "
عبير :" لاني ... ما ابيه "
ابو محمد :" اذا تفكرين في ولد خالتك خلاص تزوج "
عبير مقاطعه :" انا ما افكر في الزواج الحين "
ابو محمد :" ياعبير..."
ام محمد مقاطعه لانه ملت من هالسالفه اللي الرفض اكيد هو الرد من عبير:" مارحت للحين لابو فيصل"
ابو محمد :" ما رحت للحين يقول محمد باقي ماردوا عليه .....ياكرهي لعيلتهم مسوين فيها شرفاء ....وانه اخوان مترابطين ..."
ام محمد :" هذا اللي مقويهم ترابطهم "
ابو محمد:"ما علينا منهم ... انتي ياعبير فكري زين في اللي قلت لك"
عبير:"شف ياابوي بصريح العباره غير خالد ماراح اتزوج"
ابو محمد:"يابنتي خالد الان متزوج"
عبير بدلعها الزايد:"انت اللي فسخت خطبتي منه شف لك حل يرجع خالد لي"
وقامت تركض لغرفتها وهي زعلانه....
ابو محمد:"تسرعت ياام محمد في فسخ خطبة عبير وخالد"
ام محمد:"قلت من اول ومااحد سمعني"
ابو محمد:"لازم ادور حل"
ام محمد:"لا تعب نفسك لانه مافي حل"
ابو محمد وهو يفكر:"فيه حل ممكن يصلح اللي انكسر"

^^^^^^^^^^^^^^

كانوا جالسين في بيت ابو فيصل كعادتهم مثل هالوقت لازم يجتمعون....
ابو خالد:"يعني قررت ترجع العنود لمحمد"
ابو فيصل:"للحين ماقررت شي لان العنود ماعطتني ردها"
ابو ناصر:"هو محمد اش اللي غيره عليها فجأه"
ابو فيصل على انه مايخبي عن اخونه شي بس حس ان الموضوع هذا من الافضل مااحد يدري عنه:"تدري من هالمشاكل اللي تصير في البيوت"
ابو خالد:"بس مولدرجة انه يمد يده عليها ويطلقها بدون سبب"
ابو فيصل :"ياخوي البيوت اسرار ومااحد يدري عن اللي يصير فيها"
ابوخالد:"وانت صادق...بس اللي صار بينك انت وابو محمد"
ابو فيصل:"اللي صار بسبب العنود ومحمد اذا تصالحوا ماله داعي احنا نوقف في طريقهم"
ابو ناصر:"ماشاء الله عليك ياابو فيصل "
ابو فيصل :"مريتوا على الوالده "
ابو خالد:"اكيييييييد احد يقدر مايمرها....خصوصا بعد ماانكسرت رجلها صايره تزعل بسرعه"
ابو نا صر:"أي تزعل....من ملك خالد وهي فرحانه وتقول لو فيها شده على الرقص كن رقصت"
ابو خالد :هههههههه الا متي بيفكون الجبس عنها ......."
ابو فيصل :" الاسبوع الجاي ..."
جدة خالد (ام عبد الرحمن ) كانت محبة خالد عندها غير انقهرت انها ما قدرت تحظر ملكته لانها طاحت وانكسرت رجلها ...ما كانت تحب عبير وامها ...
ابو فيصل :" تصدق حسيت ان خالد بيهون"
ابو خالد :" لا هذا ولدي ... ما يكسر كلمتي "
ابو ناصر : " صدقت.... خالد ما شاء الله عليه .... "سكت لما دخل خالد وعيال عمه ....
فيصل : " اشفيكم ... بس دخلنا سكتوا ... "
خالد : "اكيد يحشون في احد ... "
فهد : " من بيكون غيرك لانك الان حديث الساعه ... "
ابو فيصل : ههههههه .... خالد اش كانت تبغى منك امي يوم نادتك ...
خالد : " فتحت معي تحقيق ...اش اسم عروستك ....ومن هي بنته ...واوصف لي شكلها... "
فهد : " طيب .....اش قلت لها..... وركز على وصف الشكل الله يخليك ... "
رمى خالد عليه المخده اللي كانت قريبه منه وكان الجميع يضحك ....
خالد : " ترى ان قمت بوصف لك شكلها مضبوط "
فهد : " لا .... وليش التعب ولد عمي ...هونت لا توصف شكلها ... "
خالد : " ههههههههه ...كذا ابغاك .. "

^^^^^^^^^^

[ساهر سات]

كانت سهرانه يوم الاربعاء طول الليل وما نامت الامتأخره وصحت الخميس مبكره ...والتهت طول النهار ...بعد صلاة العشاء ما قدرت تقاوم دخلت غرفتها وحطت راسها على المخده ...وغفت عينها ...انتبهت على احد يهز كتفها ...فتحت عينها بصعوبه ..وشافت سحر ...
سحر : " بسمه قومي بسرعه "
رجعت غمضت عيونها : "سحر والله ميته تعب خليني انام ساعه "
سحر : "اقول قومي جاك ضيوف "
بسمه : " اذا امل خليها تطلع "
سحر : " لا مو امل "
بسمه : ......
سحر : " اللي جا خااااالد"
انتفضت سحر في السرير وجلست : " أي خالد "
سحر : " هههههههه كم خالد تعرفين "
بسمه : "ياويلي ...هذا اش جابه "
سحر : "يالله قومي لا تضيعين وقت "
بسمه : "افففف انا ناقصه اللحين زيارته "
سحر : " اقول قومي لا يجي ابوي ينزلك بشكل ذا "
بسمه : "عمي معاه "
سحر بنفاد صبر : "ايه ....ياللا عجلي .. "
.قامت بسمه وهي مرتبكه موعارفه وين تروح ..
سحر : "انتي روحي الحمام....اكون انا جهزت لك لبسك .... "

^^^^^^^^^^

حيا الله خالد ...وينك ما عاد احد شافك ...
خالد : " تدري ياعمي التهيت في هالدنيا "
ابو عبد العزيز : " واشلون ابوك وعمامك"
خالد : " طيبن الله يسلمك "
سمعوا احد يطق الباب ...
ابو عبد العزيز : " ادخلي يابسمه مااحد غريب "
دخلت بسمه وهي مرتبكه ...وما هي قادره ترفع عيونها من الارض وحاولت تتحكم في نفسها ورفعت نظرها وشافته يناظرها وهومبتسم ...
بسمه : "السلام عليكم "
خالد وابو عبد العزيز : "وعليكم السلام ... "
مدت يدها تسلم عليه : " كيف الحال .. "
خالد : " بخير الله يسلمك ..اشلونك انتي "
بسمه : "الحمد لله"
ابو عبد العزيز : " عن أذنك ياخالد انا بدخل ارتاح شوي "
خالد : "خذ راحتك"
بعد ماطلع عمها ....ارتبكت زياده ... جلسوا وقت وهو ساكتين ...
وانتبهت انه مخلص فنجان القهوه : " اصب لك قهوه "
خالد :ايه... صبي قهوه ... "
كانت يدها ترتجف وهي تصب القهوه بالذات وهي حاسه انها يراقبها ...
خالد : " شوي ..شوي ..لا تحرقين يدك "
انقهرت منه ....وهي منحنيه تعطيه الفنجان انفك المشبك اللي كان ماسك شعرها وطاح شعرها على الجنب ...انحرجت وانحنت على الارض عشان تاخذ المشبك.... لما رفعت راسها شافت على وجهه ابتسامت سخريه كأنها قاصده انها تفك شعرها ...راحت جلست بعيد عنه وحبت تهاجمه قبل لا يتكلم ...
بسمه : " شكل عينك حاره قول ماشاء الله بغيت تكسر المشبك "
خالد : " انا اللي عيني حاره.... والا حركات بنات ....صدقيني عارف ان شعرك ناعم وطويل من غير ما تفكينه "
بسمه حبت تقهره : " فتره بسيطه ان شاء الله واقصه "
خالد : " ياويلك لو قصيتيه "
بسمه:"قص الشعر حريه شخصيه "
خالد:"لا مهي حريه شخصيه لازم الحرمه تستأذن زوجها......صح"
بسمه بضيق:"اذا انت تشوفه صح فهو... صح"
خالد وهو يبتسم:"برافو عليك....اشلون ثالث معاك"
بسمه :"تمام....."
خالد:"تصدقين انت من جد صغيره..."
بسمه:"لا انا المفروض اولى جامعه"
خالد:"هههههه حتى لو اولى جامعه صغيره..."
بسمه حبت تغير الموضوع : "اشلون امك وابوك "
خالد : " ما عليهم طيبن ويسلمون عليك"
بسمه : "الله يسلمهم "
خالد : " ويسلمني بعد ....اشفيك قاعده بعيد ...اقربي شوي ترى مااكل لحوم البشر "
بسمه : "لا انا مرتاحه كذا "
خالد : " بس انا مو مرتاح.... والا انتي انانيه ما تفكرين الافي نفسك "
انقهرت بسمه منه قالت في خاطرها هذا اسلوبه معها في اول زياره الله يستر
من بعدين ....
بسمه : "وليش ما تكون انت الاناني اللي ماتدور راحت غيرك"
خالد : " هههههه تدرين شكلنا اثنينا انانيين عشان كذا انا بجي بجنبك "
وقفت بسمه : " والله ان قربت لاطلع برى"
خالد : "هههه لهالدرجه اخوف "
بسمه : " لا بس ..."
وقف خالد : " اصلا انا طالع الحين "
قرب من بسمه وكان في يده كيس وحب يقهرها ولمس خدها : " اعطيك رقم جوالي تدقين لما تكونين فاضيه "
نزلت يده بقوه : " لا لا تعطيني لاني بصراحه مشغوله عندي امتحانات "
خالد : "اشفيك دايم انتي عدائيه كذا "
بسمه : "انا العدائيه ولا انت اللي تتهجم بالكلام على الناس "
خالد وهويتلفت : "أي ناس ....انا ما اشوف الا زوجتي"
قرب منها زياده ورجعت لورى ....ابتسم لما شاف ردت فعلها ...
خالد وهو يمد يده بالكيس : " هذي هديه بسيطه لك"
بسمه:"بدون نفس مشكور"
خالد:" يالله انا طالع تأمرين شي ..."
بسمه بعصبيه : "لااااا"
خالد :"الناس يقولون مايامر عليك عدو ....يقولون سلامتك ....مو (وهو يقلدها ) لاااا"
بسمه وهي تقلد حركته :" أي ناس ... انا ما اشوف الا زوجي ..."
خالد :"ههههههه تملكين روح الدعابه ..."
بسمه بضيق :" قليلا مما عندكم ..."
ابتسم ومر من جنبها وما حاول يقرب منها :" واذا بغيتي رقمي تلاقينه عند بدريه مع السلامه...."
بسمه :" مع السلامه "

[ساهر سات]

اول ما طلع جلست تبغى تهدى شوي وبعدين تطلع ...
سحر : "ها ... اكلمك"
بسمه : " سحر متي دخلتي "
سحر : " من اول ما طلع ...اكلمك وانتي في عالم ثاني "
بسمه بشرود : " ما انتبهت "
سحر : " قولي لي اللي صاااار بتفصيل الممل "
حكت لسحر كل اللي صار ...
سحر : " ههههههههه "
بسمه : " وش اللي يضحكك"
سحر : " بس تراك كنتي شوي جريئه...المفروض تحكمتي في اعصابك ....وانتبهتي لكلامك "
بسمه : " ما ادري اش جاني توقعت ...ارتبك لما اشوفه ... وما اقدر حتى الرد ارد ...بس نرفزني وطلعني من طوري "
سكتت بسمه شوي : " تصدقين حسيت اول ما طلع اني اكرهه... "
سحر : "ههههه ....علماء النفس يقولون اقوى انواع الحب يجي بعد الكره الشديد"
بسمه : " انا راضيه باضعف انواع الحب بس يحصل ...بعدين منهم علماء النفس اللي قريتي لهم"
سحر : "يعني لازم من الاحراج ....عديها واللي يرحم والديك .. "
بسمه : " نعديها ...عشان خاطرك "
سحر : "مشكووووووووره "
بسمه بضيق : " بس بالله عليك ...كلامه لي كلام واحد اول مره يزور زوجته "
سحر : " تراك انتي ما قصرتي فيه "
بسمه : " هو السبب"
سحر : " طيب خلي عنك ...انه نرفزك وعصبك ...ما حسيتي تجاهه بشي "
تنهدت بسمه بعمق : "حسيت بخوف "
سحر وهي رافعه حواجبها : " خوووووف "
بسمه : " اخاف اني احبه واتعلق فيه"
سحر وهي تحط يدها على جبهة بسمه : " الحمد لله والشكر... شكلها مريضه بنت عمي... فيه وحده تخاف تحب زوجها "
بسمه : "ايه اخاف ...... اخاف اكون العب بنار وما تحرق الا اصابعي "
ماردت بسمه وسرحت وهي تتمنى تكون باختيارها خالد تكون اختارت الصح .....

^^^^^^^^^^

وهوقاعد مع ولد عمه مع الشباب ....انتبه فهد له انه قاعد بعيد عنهم شوي ...
راح وجلس بجنبه ...
فهد : "اللي ما خذ عقلك يتهنى به "
خالد وهو يأشر على التلفزيون : " تصدق حلو هالفيلم "
فهد : "ههههه علينا ....طيب اش قصته "
خالد وهو يضحك : " تابعه وانت تعرف "
فهد : " ما علينا من الفيلم ...يقولون انك قبل يومين زرت بعض الناس"
خالد : "هههههه يااخي ابوي ما يخبي شي ابد "
فهد : " ايه تدري يتجمعون هالشياب وما عندهم الا احنا يالضعوف ماده دسمه للحديث . "
خالد : " وبما اني حديث الساعه على قولتك ...فما عندهم الا انا "
فهد : " هههههه عليك نور"
خالد : "يالله عقبال ما تصير انت حديث الساعه"
فهد : " اقول لا تغير السالفه ...الظاهر من السرحان اللي تو ان الحبيب وقع ولا احد سمى عليه ...(وهو يغمز له )حسيت بالحب يجري في عروقك"
خالد : " أي حب واللي يرحم والديك ...الحب مره وحده في الحياه"
فهد : " غلطان ياولد عمي ...وبعدين كم مره قلت لك البنت مالها ذنب فلا تظلمها "
خالد وهوعاقد حواجبه : " ومن قال لك اني بظلمها ...بتعيش معي معززه مكرمه بس مولازم احبها "
فهد : "طيب انطباعاتك عن الزياره "
خالد وهويفكر : "تصدق اول ما احب طاريها ....الحين مادري صارت عادي بالنسبه لي يعني مااعصب لما اتذكرها"
فهد وهو يبتسم : " ان شاء الله تصير تفرح لما تذكرها من الحب"
خالد:"تطمح في كثير ياولد عمي"

[ساهر سات]

كانت قاعده تتأمل بنت عمها وهي تكلم زوجها....وتسمع ضحكاتهاوهي تسمع كلامه الحلو لها...كان الحب يطل من عيون سحر....وسرحت في عالمها حتى ماانتبهت ان بنت عمها سكرت التلفون...
سحر:"بسمه....اكلمك..."
بسمه:"ها....ماانتبهت "
سحر:"ما تنلامين اكيد تفكرين في حبيب القلب"
بسمه:"مافي قلبي حبيب"
سحر:"وخالد...."
بسمه:"خالد زوجي بس شعوري ناحيته عادي"
سحر:"ايه شعورك عادي بدليل من زيارته لك وانتي بس سرحانه"
بسمه:"ماادري احس اني خايفه"
سحر:"بسمه اكيد أي بنت في مكانك بيكون شعورها كذا....انتي بتتزوجين واحد في حياتك ما شفتيه وما تدرين اشلون طباعه...بس بعد الزواج كل شي يتغير"
بسمه:"انتي مثلا قبل زواجك من ابراهيم كيف كان شعورك"
سحر:"شوفي على انه ولد خالتي واعرفه من احنا صغار بس لما خطبني حسيت اني مااعرفه....وكان الخوف مسيطر علي لكن صدقيني بعد الزواج كل شي يتغير وصار هواهم شخص في حياتي"
بسمه:"سحر اوصفي لي الحب"
سحر:"ههههههه كلامك غريب"
بسمه:"انتي الحين تحبين.... اوصفي لي هالحب"
سحروهي تفكر:"ماادري اشلون اوصف لك بس اقدر اقول اني مااقدر استغي عنه ولا اعيش بدونه"
بسمه وهي تعدل جلستها:"يعني انتي تحبين نفسك اكثر"
سحر:"الحمد لله والشكر....اشلون احب نفسي اكثر"
بسمه:"لانك تتكلمين عن نفسك ما تقدرين تستغنين عن هولا..."
سحر وهي تقاطعها:"لو مااحبه ماقلت كذا..."
بسمه:"انتي تحبينه اكيد لانك تستفيدين منه حتى لو.... السعاده اللي يعيشك فيها...يعني حبك له مو لسواد عيونه"
سحر:"لا موشرط احبه واتمنى له الخير في كل حياته واحاول اسعده قد مااقدر"
بسمه:"حتى لو سعادته مع غيرك..."
سحر:"اموته لو ادري ان سعادته مع غيري"
بسمه:"شفتي ان الحب فيه انانيه"
سحر:"بسمه اليوم قريت في الجريده عن طبيب نفسي يمدحونه خلينا نعرضك عليه لاتفضحينا من العالم احس حالتك مستعصيه"
وراحت تفكر في الحب اللي هجر قلبها وغاب عن حياتها من بعد موت اهلها وحل محله الحرمان والالم حتى صارت تشك في وجود شي اسمه الحب....

^^^^^^^^^^

كان يحس بالصدمه والذهول من اللي قاعد يسمعه عقب ماحطموا حب حياته جاين يصلحون الباقي....
ابو محمد:"والحمد لله ان المياه رجعت لمجاريها واحنا قبل كل شي اهل..."
ابو فيصل:"صدقت....واعذرنا يااخوك ان غلطنا عيك بالكلام بس ساعة غضب"
ابو محمد:"الغلط بدى من محمد الله يهيديه بس ان شاء الله ما يتكرر هالشي"
ابو فيصل:"وهذا العشم في محمد"
محمد:"ان شاء الله ماتسمع الا اللي يسرك"
فيصل:"وترى احذرك يتكرر اللي صار"
ابو فيصل ماعجبه كلام فيصل بس ماحب يحرجه...
محمد:"يافيصل انا غلطت غلطت عمري ولابكررها "
كان ابو خالد حاس باللي قاعد يدور في راس ولده وكان مبين على ملامح وجه خالد انه يحاول يتمالك اعصابه...
ماكان ابو خالد الوحيد اللي حاس بخالد كان ابو محمد يناظره وحس انه هذا هو الوقت المناسب.....
ابو محمد:"وانا ياابو خالد ندمت لاني فسخت خطبة خالد وعبير"
ابو خالد:"اللي صار انتهى..."
ابو محمد:"لاني ندمان ياخالد اعرض عليك قدام ابوك وعمامك اني اصلح اللي صار"
ابو خالد:"اشلون تصلح وخالد اللحين متزوج"
ابو محمد:"كل شي ممكن يتصلح"
ابو ناصر:"ترضي تزوج بنتك واحد متزوج"
ابو محمد:"لاااا....ماارضى بس اذا خالد يبغى عبير يطلق مرته"
ابو خالد وهو معصب:"تظن بنات الناس لعبه في يدك تزوج وتطلق على كيفك"
ابو محمد:"هد اعصابك انا عرضت على خالد وهو بكيفه"
ابو خالد:"لا مو بكيفه...الزواج مهو لعبه..."
ابو محمد حب يوقع بين خالد وابوه:"الله يهديك يابو خالد...هو عنده لسان ويرد"
كان خالدمنقهر من اللي يصير حوله....وما حب يحرج ابوه قدامهم وحاول يكلم ابوه بهدوء:"ياابوي...هذا الموضوع يخصني انا لوحدي"
وقف ابو خالد وهو معصب:"لا مايخصك لوحدك...واذا طلقت لا انت ولدي ولا انا ابوك"
وطلع ابو خالد وهو معصب وكان خالد يحاول يلحقه بس عمه ابو ناصر اشر له يقعد وقام هو وراه.....

^^^^^^^^

[ساهر سات]

كانوا مالهم خلق دروس وكل وحده تناظر في ساعتها متى يدق الجرس ....الجميع ابتسم لما سمع صوت الجرس واللي عندهم في هالوقت هو الصوت الوحيد اللي يتمنون يسمعونه...
بعد ماطلعوجلسوا وهم لازال فيهم خمول من الدروس ...
امل:"اشفيك يابسمه ماجيتي امس..."
بسمه:"سوووووري بيتكم صار محرم علي دخوله"
امل:"قانون جديد هذا"
بسمه:"ايه..."
امل:"والسبب..."
بسمه:"لسببين....اولا عشان الزواج قرب وثانيا لان عمي درى اني قابلت خالد في بيتكم..."
امل:"اش دراه..."
بسمه:"ماادري بس تدرين مرة عمي تعرف كل حريم الحاره ويمكن وحده شافت خالد داخل بيتكم...ماادري"
امل:"وعمك اش سوى لما درى..."
بسمه:"لو ماسحر الله يجزاها خير كان اخذت علقه محترمه"
دلال:"بصرااااحه مجرم عمك..."
امل:"هو مجرم بس....هو الاجرام يتبرى منه..."
بسمه:"ههههههه شكى لك الاجرام منه"
امل:"تضحكين....انتي لو تدرين منهو اللي بغى يزوجك كان ضليتي دهرك كله تبكين"
بسمه والاهتمام يطل من عيونها:"اشلون تعرفينه اذا انا ماادري منهو"
امل:"تعرفين امي تعرف اغلب حريم الحاره ودرت منهم"
بسمه:"يعني واحد اعرفه..."
امل :"تعرفينه زين"
بسمه:"مين قولي لا تلعبين في اعصابي..."
امل:"ابو صالح صاحب البقاله اللي باخر الشارع..."
بسمه وهي حاطه يدها على وجهها:"لا تقولين هو..."
امل:"هو ياعيوني ...."
بسمه:"حسبي الله عليه انا سمعتهم يتكلمون عن واحد متزوج حرمتين بس ماتوقعته هو..."
دلال:"اش حلاته ...رجال عنده بقاله...مادامه طار على بسمه خذيه ياامل"
امل:"بسم الله علي...انتي لو تشوفينه...رجال كبير حيل غير كذا من الشياب اللي مايهتمون في لبسهم شكله الحمد لله والشكرالله معطيه خير بس مو مظهر النعمه عليه...حرمتين حاكرهم في بيت واحد"
دلال:"تتوقعين كان سكن بسمه معهم..."
بسمه:"بسم الله علي صدقيني كان انتحرت لو تزوجته"
امل:"ليش تنتحرين...ماراح يسكنك معهم اكيد بيحطك في الملحق"
بسمه:"والله اكلمكم جد احس شعر راسي وقف لما تخيلته زوجي..."
امل:"عشان تعرفين قدر خالي"
بسمه:"حرااااام عليك....تقارنين بين الثرى والثريا...يحبي لخالك الله لايخليني منه انا اشهد انه على انه شرير يطلع حمل وديع عند ابو صالح"
امل:"وينه خالي يسمع هالكلام الحلو اللي ينقال عنه"
ما ردت بسمه وهي تفكر في ابو صالح وحريمه اللي كل وحد اشرس من الثانيه...

^^^^^^^^^^

[ساهر سات]

قاعد مع عمه اللي لما شاف اللي صار حب يجلس معه على انفراد...
ابو فيصل:"تراك غلطت يوم رديت على ابوك...."
خالد:"ياعمي خفت ينهي الموضوع وانا جالس وحبيت ابين له اني لازم افكر"
ابو فيصل:"المفروض سكت وعقب تفاهمت معه"
خالد:"حاولت بس ماقدرت"
ابوفيصل:"طيب تحس اللي تبغى تسويه صح..."
خالد:"ماادري ياعمي محتار"
ابوفيصل:"طيب تكلم انا اسمعك"
خالد:"اني اتزوج عبير هذا اللي ابيه بس اخاف ادمر بسمه لو اطلقها"
ابوفيصل:"كمل اسمعك..."
خالدوهو حاط يده على جبهته ومبين على الحيره"واخاف اني اندم لو اترك هالفرصه اللي اكيد بتكون الوحيد في اني اتزوج عبير"
رفع عيونه لعمه"عمي انت لو مكاني اش تسوي..."
ابوفيصل:"شف ياخالد مارح احد يقدر يفكر لك احسن من نفسك"
خالد:"طيب شور علي..."
ابوفيصل:"تطيعني في اللي اقوله"
خالد وهو يبتسم لعمه:"مااقدر اوعدك ياعمي...بس ابغاك تشور علي"
ابوفيصل:"لو قلت غير كذا كان عرفت انك تاخذني على قد عقلي..."
خالد"افاااا عليك ياعمي انت الخير والبركه..."
ابوفيصل:"تصدق تعجني ياخالد وتذكرني بشبابي..."
خالد:"فيصل وفهد لو يسمعونك ذبحوني..."
فيصل:" ما عليك منهم....المهم انت ياخالد فكر بعقلك مو بقلبك.....ولا تنسى نتيجة قرارك ممكن تدمر غيرك""
خالد وهو يتنهد:"ياليت ابوي مااستعجل بالملكه"
ابوفيصل:"ياليت اللحين ماتنفع"
خالد:"بس ياعمي لو ماملكت كان اللحين مو شايل هم بسمه انها بتصير مطلقه بدون ذنب"
ابوفيصل:"يعني قررت تطلقها"
خالد:"تقريبا هذا اللي ممكن يصير....بس بغيت منك خدمه ياعمي""
ابوفيصل"آمر ياخالد"
خالد:"ما يامر عليك عدو....بس ابوي مااحد يقدر يغير رايه غيرك"
ابوفيصل:"تبغى اقنعه تطلق مرتك..."

[ساهر سات]

خالد:"لااا...ابغاه مايتدخل ولا يعترض على القرار اللي بتاخذه مهما صار..."
ابوفيصل:"انت فكر في الموضوع ...وخل ابوك علي..."
خالد وهو قايم بيطلع:"الله لا يحرمنا منك ياعمي"
ابوفيصل:"بس لاتنسى ياخالد فكر زين ولا تظلم ناس مالهم ذنب"

^^^^^^^^^

جلس يلاعب عياله اللي شوقه لهم ماله حد....وكان يناظرهم والفرحه تطل من عيونهم وهويلوم نفسهاشلون بغى يهد بيته بيده ويضيع عياله وناظر العنود حبيبة قلبه اللي من طلعوا من بيت اهلها...وهي ساكته ماتتكلم الااذا كلمها....
طلعوا العيال يركضون على غرفتهم....قرب محمد منها ومسك يدها...
محمد:"سااااامحيني يالعنود اللي سويته موسهل"
العنود:"لو ماسامحتك مارجعت لك"
محمد:"قلبك كبير ياام نواف"
العنود:"بس لا تغلط مره ثانيه وتعتمد على قلبي الكبير"
محمد:"لاااا....توبه.....بس صدق الخبر الحلو اللي سمعته"
العنود وهي تبتسم:"ايه..."
محمد:"ان شاء الله نوف يارب"
العنود:"ترى مهو حلى هو..... نواف بعدين نايف وتبغى نوف"
محمد:"ايه واللي عقب نوف منيف واخر العنقود....نوفه"
العنود:"ماشاء الله مجهز كل شي"
محمد وهوبتنهد:"ماادري اشلون لعب الشيطان في عقلي وكنت بضيعكم من يدي"
العنود"الحمدلله انت صلحت غلطك وان شاء الله مايتكرر"

^^^^^^^^^^^^

كانت امل وبسمه راجعين من المدرسه مع سواق اهل امل وكانت هند غايبه....حست امل انه هذي فرصتها حتى تشوف هي وامل ابو صالح...
امل:"سليم وقف عند البقاله القريبه من البيت"
بسمه:"اش تبغين في البقاله"
امل:"حتى نشوف ابو صالح"
بسمه بعصبيه:"لا....ماابغى اشوفه"
امل:"مو لازم تشوفينه انا ابغى اشوفه"
بسمه:"تعرفين شكله ليه تبغين تشوفينه"
امل:"ابغى اشوفه من قريب"
بسمه:"حراااام عليك ياامل انا من يجي طاريه اموت اشلون لو اشوفه..."
امل:"ما يجيك الا العافيه ان شاء الله"
بسمه وهي تأشر على السواق:"ماتخافين يعلم عليك امك"
امل:"سليم ماراح يعلم بس هالخايسه اللي بجنبه"
بسمه:"ان شاء الله تعلم عليك"
امل:"عاااادي اقول بسمه كانت مشتهيه عصير من عند ابو صالح"
بسمه:"اموتك لو قلتي كذا"
ما ردت امل عليها لانهم تقريبا وصلوا البقاله كان ابو صالح من حظهم واقف برى يكلم واحد....كانت امل تناظره وتعلق وبسمه ماقدرت ترفع نظرها....
امل:"بسمه الله يخليك ناظري..."
بسمه:"مااقدر احس اني خايفه"
امل:"الحمد لله والشكر السياره مضلله وما يشوف اش داخلها وحتى لو شاف متغطيات اش بيشوف"
بسمه:"مو خايف من انه يشوفنا.... انا اللي خايفه اشوفه...."
امل:"وليش تخافين انتي اللحين متزوجه...ومالك علاقه فيه"
تجرأت بسمه ورفعت نظرها ولما شافته حست نبضات قلبها زادت...وهي تشوف رجال منحني ظهره لابس ثوب ابيض من قدمه تغير لونه...وكان يضحك وبانت اسنان صفراء مرعبه....
بسمه:"الله يخليك يامل خلينا نروح"
امل:"اللي قاهرني الله معطيه فلوس وشوفي لبسه وبيته حتى عياله بخيل عليهم..."
بسمه بضيق:"ما علينا منهم...بس خل نروح احس بيغمى علي"
امل:"ههههه بسم الله عليك....سليم ياللا روح البيت"
سليم:"ما فيه يبغي يشتري من البقاله"
امل:"لا مانبغى"
سليم:"ليه انت فيه يقول وقف عند بقاله..."
امل:"ياربي اش يفكني منه....ما فيه فلوس"
سليم:"انا فيه عندي فلوس..."
امل:"الله ياخذك مانبغى نشتري روح البيت"
هز راسه وحرك السياره....بسمه ماتدري ليش اثر فيها لما شافت ابو صالح....علىالرغم انها تعرفه لكن انها تناظره وهي تتخيله انه كان بيصر زوجها هالفكره ارعبتها....

^^^^^^^^^^^^