جروحى تنزف احزان

[ساهر سات]

قاعدين يتمشون في السوق...وراهم شباب يلاحقونهم....لما شافوا اشكالهم اللي تشجع وما عندهم ممانعه احد يلاحقهم...
كانت عبياتهم ونقاباتهم للزينه اكثر منها للستر....
مشاعل:"شوفي هالمزيون اللي ورانا اشلون يناظرك"
عبير:"عاد انتي يالغبيه سوي ثقل موكل شوي تلتفتين"
مشاعل:"اخييييرا طلعتي من عزلتك وطلعتي معي"
عبير:"زهقت وانا حابسه عمري في البيت "
مشاعل:"ايه كذا عيشي حياتك وانسي خالد"
عبير:"ومن قالك اني بنسى خالد"
مشاعل:"انتي اليوم مبسوطه زياده شكل وراك شي"
عبير:"ايه خالد اخير بيرجع لي"
مشاعل:"تدرين مشينا نجلس ونشرب عصير واسمع منك السالفه بالتفصيل"
عبير:"ياللا...."
راحوا والشباب وراهم وهم مفتونين من هالجمال خاصه عبير...
وانهبلوا لما شافوا عبير اول ماجلست نزلت النقاب كانت تبان قمه في الجمااال...
مشاعل:"ياللا ياحلوه قولي اللي عندك..."
عبير:"هذا الله يسلمك محمد رجع العنود....وابوي عرض على خالد انه يصلح كل شي ويرجع خالد حبيب قلبي خطيبي من جديد"
مشاعل:"اش كان رد خالد"
عبير:"مارد بس يقول ابوي من شكله انه اوكيه..."
مشاعل:"ومرته..."
عبير بغرور:"بيطلقها....هالمتخلفه مابقى الاهي تخطف مني خالد"
مشاعل:"حررررام.....والله اني رحمتها"
عبير:"وليش ترحمينها اللي يوقف في طريقي ادمره..."
مشاعل:"الله يستر ولا اكون لك عدوه ياعبير..."
عبير:"لاااا انتي مستحيل تكونين عدوتي"
وهي في خاطرها والله مايندرى عنك ياعبير...
مشاعل:"ماعليه بكون معك صريحه...."
عبير:"تفضلي ياحياتي..."
مشاعل:"انتي تحبين خالد..."
عبير:"بالله هذا سؤااال انا مو احب خالد انا اموت في خالد..."
مشاعل:"طيب اللي يحب مايخون الثاني وانتي اسمحي لي صح ماتسوين شي كبير بس تحبين تظهرين جمالك قدام غيره وتستمتعين بالمدح اللي تسمعينه من الشباب وممكن تكلمين توسعين صدرك"
عبير:"هذا انتي قلتيها اوسع صدري وما يتعدى هالشي التسليه وبعقل بعد الزواج"
مشاعل:"صعب تتغيرين بعد الزواج..."
عبير:"اذا انا مع خالد مو صعب وبعدين شوفي نفسك اول وبعدين كلميني"
مشاعل:"اقل شي انا مافي قلبي حبيب....وبعدين ماتخافين خالد يشوفك مره من المرااات"
عبير:"لاااا ان شاء الله وبعدين تعالي انتي شايفتني مبسوطه وقلتي تنكدين علي"
ورجعت ابتسمت لشاب اللي كان قاعد مقابلهم وعيونه على عبير يفحصها بوقاحه وهالشي كان يحسسها بالسعاده لانها تحب تلفت نظر الكل ....

^^^^^^^^^^^^^^

[ساهر سات]

يابوي الله يخليك....خلني على راحتي....
ابو خالد:"وراحتك في تطليق هالمسكينه"
خالد:"يبه اطلقها اللحين احسن من عقب"
ابو خالد:"ليش توافق على الخطبه اذا كنت بتطلقها في النهايه"
خالد:"انتوا ضغطتوا علي"
ابو خالد:"لو وقفت وقفتك اللحين ماكان احد ضغط عليك"
خالد:"كنت ابغى اسعدك يبه"
ابو خالد:" واللحين تبغى تتعسني"
خالد:"لا يبه بس اللحين لقيت سعادتي ليش اضيعها من يدي"
ابو خالد:"وبسمه ما فكرت فيها..."
خالد:"لا تضن اني سعيد باللي بيصير فيها بس مو بيدي"
ريم اللي كانت ساكته طول الوقت:"احس بصرااااحه ماحبيتها"
خالد بعصبيه:"مو لازم تحبينهاوبعدين اللي مايخصك لاتتكلمين فيه"
ريم وهي طالعه:"انا طالعه بس مااقدر اخفي سعادتي من انك بتطلق هالقرويه..."
وراحت تركض لانه شافت ابوها وخالد معصبين عليها...
ابو خالد:"كيفك ياخالد بس انا اقول لا تتسرع..."
خالد:"فكرت زين واشوف انه اللحين الوقت المناسب باقي على الامتحانات شهر وحتى ما تضيع الامتحانات على بسمه"
ابو خالد:"يهمك انها ما تضيع الامتحانات"
خالد:"والله ما تهون علي بس نصيبها كذا"
ابو خالد:"كيفك بس انا مالي وجه اروح معك..."
خالد:"لا تروح بس لا تزعل علي..."
ابو خالد وهو يتنهد:"ماني زعلان ياخالد الله يسعدك ويوفقك"
خالد وهو يبتسم:"وانا ماادور الارضاك علي"
ابو خالد:"راضي عليك ياولدي واتمنى لك السعاده بس ياخوفي انك قاعد تضيع السعاده من يدك"
خالدوهويتنهد :"الله يسهل مافيه الخير...عموما بروح لابو مازن ونروح لابو عبد العزيز"
ابو خالد:"قلت لبدريه...."
خالد:"لا...بقولها عقب ماارجع من عند ابو عبد العزيز..."
سمع التلفون يرن وكان قريب منه....
خالد:"الو"
امل:"هلا باحلى خال في هالدنيا"
خالد:"هلا اموله...اشخبارك واخبار امك..."
امل:"انا بخير وامي بخير ماودك تسأل عن بعض الناس
ارتبك لما قالت كذا وحب يبان قدامها طبيعي حتى يخلص الموضوع لان اكبر عقبتين هم ابوه وبدريه...ابوه واقتنع اخيرا وبدريه ماتدري للحين لانه توه يصرح برايه بعد ما وصى مااحد يخبرها....
خالد:"اشخبارها.."
امل:" طيبه تسلم عليك"
خالد:"الله يسلمك ويسلمها"
امل:" الله ياخالي اش الهديه الحلوه اللي جبتها"
خالد:"عجبتها"
امل:" ايه...بس دايم تقول عنك شرير ماادري ليه"
ابتسم خالد غصب عليه لما تذكر زيارته لها في بيت عمها...وحس بالم في قلبه لما تخيل اش بتكون ردت فعلها...
امل:" هيه...يالحبيب اكلمك..."
خالد:"هلا امل..."
امل:" اقول بس ذكرت بسمه نسيت كل شي"
خالد:"شفتي اشلون"
امل:" ايه...قطع الحب وسنينه حتى بسمه من يجي طارك تروح عالم ثاني"
حس ا نه ماوده يسمع عنها أي شي ثاني...حتى ما يحس بتأنيب الضمير اكثر ماهو حاس...
خالد:"اقول انتي ليش متصله"
امل:" كنت زهقانه وقلت اتصل واللي يرفع السماعه اسولف معه "
خالد:"اقول يالثرثاره ابوك موجود"
امل:" اولا الثرثاره اسم لرهف وحقوقه محفوظه ثانيا ايه ابوي فيه"
خالد:"خلاص بلغيه اني بمره اصلي معه العشاء في المسجد وابغاه في موضوع"
امل:" طيب اقول لبسمه تتجهز لانك بتمر عليها"
خالد:"بعصبيه:"لااا لا تقولين"
امل وهي متفاجأه من ردة فعله:"طيب لا تعصب...ياللا تامر شي"
خالد" سلامتك سلمي على امك"

^^^^^^^^^^

[ساهر سات]

كانت على السرير وتلعب في شعرها والسعاده ظاهره في وجهها وهي تسمع عبير اللي تعبر عن فرحها...
ريم:"الحمد لله اخير افتكينا منها..."
عبير:"ريم متاكده انتي"
ريم:"أي والله وتوني طالعه من عندهم وخالد بيروح العشاء ينهي كل شي"
عبير:"الدنيا ماهي وسعتني من الفرحه"
ريم:"اكييييد حبيب القلب بيرجع لك اخير"
عبير:"ماني مصدقه...احس اني في حلم"
ريم:"لا انتي مو في حلم...بس لاتغلطين غلطتك الاولى وتاجلين الملكه...على طول خليها"
عبير:"لا الحين على طول ملكه اخاف العنود ومحمد يتطلقون مره ثانيه"
ريم:"ايه...خلينا نفرح شوي"
عبير:"تصدقين اغار من هالبسمه شافت خالد وقعدت معه اكثر مني"
ريم:"وليش تغارين اصلا لو تهمه ماتخلى عنها بهاالسهوله..."
عبير"تلقينها اللحين تموت فيه صراحه خالد ينحب...بتكون صدمتها قويه"
ريم:"نفسي اشوف وجهها وهي تسمع الخبر"

^^^^^^^^^^^

كان في سيارته ينتظر الاذان مابغى يدخل عند بدريه...وكان بيت بسمه قريب منه فكر فيها.... وحس انه حقير وتافه.... وهي بيحطمها بكل برود قال في خاطره ياليتني ماشفتك يابسمه ولا شفت روحك الطاهره البرئه اللي بيدي بقضي عليها...كان خاطره يشوفها ويطلبها تسامحه ...شبه نفسه بقاتل يطلب السماح بكل برود من مقتوووول بدون رحمه....

[ساهر سات]

كان في السياره عايش صراع داخل نفسه....ويفكر في بسمه...وردة فعلها لما تدري....
وهي مالها ذنب في كل اللي يصير...بس لما تذكر عبير حس ان بسمه بتنظلم اكثر لو تزوجها وهو يحب عبير هالحب الجنوني...في الاخير اقنع نفسه ان الطلاق اللحين احسن من عقب...وبسمه بنت حلوه واكيد بتحصل اللي يسعدها اكثر منه...
ما يدري ليه ضايقه لما فكر ان بسمه تكون لواحد ثاني...
انتبه على مازن ولد اخته يأشر له من برى السياره......
نزل من السياره...
خالد:"هلا مازن"
مازن"هلا خالي...اشفيك قاعد في السياره؟؟؟"
خالد:"انتظر الاذآن حتى انزل اصلي"
مازن:"من زماااااان اذن واللحين بتقام الصلاه...حتى شف الناس رايحين للمسجد"
التفت خالد وشاف ياكثر اللي رايحين للمسجد...وهو في عالم ثاني...
خالد:"صادق....ياللا مشينا للمسجد..."

**********

قاعد مع اخته وشايف السعاده على وجهها من بعد مارجعت لبيتها...
فهد:"اللي يشوفك اللحين مايقول هذي العنود اللي في بيتنا..."
تنهدت:"لا تلومني يافهد"
فهد:"ماالومك والحمد لله ان كل شي تصلح"
العنود:"الحمد لله...الا انت يالحبيب متى ناوي تودع حياة العزوبيه"
فهد:"لو علي.... كان من اليوم قبل بكره بس...."
العنود:"انا نفسي اعرف .....انت ليه ماتخطبها وتشوف؟؟"
فهد:"انا خايف ان ريم ترفض وبكذا اسبب حساسيات في العايله"
العنود:"اولا علاقة اهلي اقوي.... من كذا ثانيا انت ليه متوقع ترفضك؟؟؟"
فهد:"ماادري عندي احساس"
العنود:"انت طيعني وخلني اجس نبضها واشوف"
فهد اللي يبغى يغير السالفه:"دريتي عن خالد انه بيطلق مرته"
العنود:"لا تقول..."
فهد:"أي والله بس لا تقولين لاحد"
العنود:"ليه مااحد يدري؟؟"
فهد:"لا مايدري الا انا واهله توه بلغهم..."
العنود:"حراااااااام اش ذنبها"
فهد:"مالها ذنب..."
العنود:"تصدق احس اللي بيروح ضحية طلاقي هي هالادميه"
فهد:"أي والله الحبيب يبغى عبير..."
العنود:"المشكله خالد مغشوش فيها"
فهد:"من حبه لها مايشوف عيوبها"
العنود:"لا تلومه اللي يشوفها في بيت خالتها ما يصدق انها عبير اللي في بيت اهلها"
فهد:"احيانا وانا جايك اشوفها طالعه لوحدها مع السواق وشكلها الله المستعان...اشلون محمد برضى تطلع كذا"
العنود:"محمد مشاكله مع اهله بسبتها "
فهد:"لو انا مكانه اكسر راسها ولا اخليها تطلع كذا"
العنود:"لما يجيه ابوه ويقوله مالك دخل في بنتي صدقني غصب عنه يصير يتحاشى الهواش معها حتى مايزعلون اهله عليه"
فهد:"حتى ولو...اخ يالقهر وخالد يبغى يتزوجها..."
العنود:"يعني خلاص بيطلق مرته"
فهد:"اليوم بعد العشاء بيروح لعمها ويتفاهم معه..."
العنود:"على طاري العشاءما سمعت الاذان"
فهد:"سمعته..بس احتري تقام الصلاه"
العنود:"انت مستحيل تغير طبعك؟؟؟"
فهد:" أي طبع؟؟"
العنود:"ما تلحق الصلاه الا بعد ماتنتهي الركعه الاولى.."
فهد:"لا ابشرك اللحين صرت اللحقهم قبل لا يركعون"
العنود:"طيب يافالح لا تضيع الوقت ورح اللحق الصلاه"

**********

طلع من المسجد وهو حاس انه قرر القرار الصح...له ولبسمه ولعبير...
كان ابو مازن وابوعبد العزيز ومعهم رجال ثالث...واقفين يسولفون برى المسجد...
سلم عليهم..
ابو عبد العزيز:"حيا الخالد..."
خالد:"الله يحيك"
ابو عبد العزيز:"تمرنا تتقهوى عندنا..."
خالد:"اكيد لازم امركم..."
كان خالد مستغرب من نظرات الرجال الثالث...
ابو عبد العزيز:"ياللا يايو صالح...مشينا..."
ابو صالح:"على اني زعلان عليك بس ما عليه ياللا مشينا..."
مشى ابو عبد العزيز وابو صالح قبلهم...وكان خالد متعمد يمشي ببطء حتى يقدر يكلم ابو مازن على راحته...
خالد:"يابو مازن بغيت اكلمك بموضوع قبل ما نوصل بيت ابو عبد العزيز.."
ابو مازن:"تفضل..."
خالد:"بس قبل يااخي هالشايب نظراته لي غريبه"
ابو مازن:"هههههه ما ينلام..."
خالد:"اشلون ماينلام..."
ابو مازن:"هذا يعتبرك عدوه اللدود"
خالد:"اش بيني وبينه حتى يعتبرني عدوه"
ابو مازن:"خطفت منه الزوجه الثالثه"
خالد من الصدمه مارد...بس تعابير وجهه كانت كافيه ان ابو مازن يكمل...
ابو مازن:"ابو صالح خطب بسمه قبل ما تخطبها بشهروسافر على انه لما يرجع يتم كل شي رسمي...بس لما رجع لاقى بسمه متزوجه"
خالد:"وتتوقع عمها كان بغصبها عليه"
ابو مازن:"اكيييييد....ها ماقلت اش الموضوع اللي بغيتني فيه"
خالد:"بعدين اكلمك"
ابو مازن": على راحتك"

دخلوا المجلس وكان ابو صالح موجود...نسى خالد كل شي وكان بس يناظر ابو صالح...ويراقب تصرفاته واشلون كان يشرب القهوه بصوت اعتبره خالد مشمئز...
والتمر وهو يحطها بين اسنانه اللي اكل الزمان وشرب عليها...غير اسلوبه في الكلام اللي تخلي الواحد غصبا عنه يكرهه...
ما تخيل بسمه وبرقتها ونعومتها تكون زوجه له....عمها كان بيغصبها عليه من اول اشلون لو تصير مطلقه أي مصير مجهول بختاره لها...
ابو عبد العزيز:"اكلمك ياخالد"
خالد:"ما انتبهت اش قلت"
ابو مازن:"لا تلومه اكيد وده يشوف بعض الناس"
راقب خالد ملامح ابو صالح اللي بان عليها الضيق الشديد...دليل ان الرجل لازال شاري بسمه....
خالد:"ههههههه كاشفني ياابومازن"
ابو عبد العزيز:"مافيها شي مرته بس للاسف هم اللحين في السوق تعرف بعد تجهيزات العرس"
خالد:"خساااره مالنا نصيب نسلم"
ابو عبد العزيز:"خيرها بغيرها"
وجلسوا يسولفون وخالد حاس انه متضايق من قعدت ابو صالح في وجهه...
استئذن خالد وطلع...
وهو طالع كان فيه حريم داخلات باكياس نزل خالد راسه حتى ما يضايقهم...
وهو حاس ان بسمه وحده منهم...
سمع صوت وحده تكلمه واضح من صوتها انها كبيره في السن عرف انها ام عبد العزيز...
ام عبد العزيز:"اشلونك ياخالد"
خالد:"بخير الله يسلمك ..اشلونكم انتوا..."
ام عبد العزيز:"الله يسلمك..."
خالد:"ياللا استئذن ياام عبد العزيز"
ام عبد العزيز:"في امان الله...سلم على اهلك"
خالد:" الله يسلمك"

**********

[ساهر سات]

في نفس لوقت كانت هند وهدى يناظرون مع الدريشه...
هدى:"تصدقين احلى من الوصف بكثييير"
هند:"انا شفته قبل كذا بس اللحين احسه احلى بكثير"
هدى بغيره:"اما بسمه عليها حظ..... ياللطيف.."
هند:"ايه....بس لا تنسين عبير اللي تقولين انه يحبها"
هدى:"بس مااتوقع انها تفكر فيه بعد ماتزوج غيرها..."
هند:"ما تدرين...."
هدى:"ولو ان نظراتها لبسمه في الملكه نظرات تهديد"
سمعوا صوت والتفتوا شافوا بسمه وسحر...
سحر:"اش تسون في الدريشه..."
هدى:"ابد سلامتك بس نشوف رجل بنت عمنا..."
سحر:"انتبهوا لا يشوفكم..."
هند:"واذا شافنا اش بيصير يعني..."
هدى:"اقول بسمه ما سلم عليك وانتي داخله..."
بسمه:"لا..."
هند:"غريبه...."
سحر:"ما غريب الا الشيطان...اكيد ماعرفها"
هدى:"حتى ولو ...لو غيره كان رجع المجلس الين تدخل وطلب يقعد معها.."
بسمه اللي تبغى تقهرهم:"انا قلت له اني ماراح اطلع له مره ثانيه"
هند:"ما شاء الله وهو صاير مطيع لك....هذي سحر ما طاعها ابراهيم وكانت يغصب عليها انها تطلع له"
كانت ام عبد العزيز توها داخله...
هدى:"يمه خالد ما سأل عن بسمه"
ام عبد العزيز:"لا..."
هدى وهي تنا ظر بسمه:"شفتي حتى السؤال ما سأل"
بسمه بعصبيه:"والله سأل ولا ما سأل هذا شي ما يخصك"
ام عبد العزيز والشرريطلع من عيونها:"قصري حسك يابسمه...لا تظنين اني مااقدر اكسر راسك اللحين..."
سحر:"يمه الله يهديك"
ام عبد العزيز:"ما تسمعينها اشوف طلع لها لسان هاليومين..."
سحر:"يمه هم استفزوها..."
ام عبد العزيز:"ما قالوا الا الصدق...ما سأل عنها..."
بسمه بهدوء:"بكيفه هو حر...."
هدى:"ماادري ليش تزوجك ...بس شكل بدريه لها يد في الموضوع"
طلعت وهي مهي قادره تتحمل استفزازهم لها....من يوم ملك خالد وهم يعايرونها بقلة زياراته لها وانه مايكلمها ويزرعون الشكوك في راسها.....

**********

دخل البيت وهموم الدنيا فوق راسه...تمنى يطلع غرفته وما يشوف احد لانه ماله خلق يتكلم ...
لكن لما دخل الصاله كانت ريم وابوه قاعدين....سلم وهو متجه لغرفته...
ابو خالد:"خالد...تعال..."
ريم :"ها...اش سويت..."
خالد:"بعصبيه:"مالك دخل....وقومي فارقي عن وجهي..."
ريم:"طااالعه بس لا تعصب..."اول مااختفت عن عيونهم وقفت حتى تسمع كل شي...
ابو خالد:"بدريه اتصلت...وشكل ابو مازن ماقالها..."
خالد:"اكيد ماقالها لانه ماصااار شي..."
ابو خالد بان الاهتمام على وجهه:"تعال اجلس...وقولي اش صااار"
راح خالد وجلس بجنب ابوه...كان محتاج يتكلم مع احد دق على فهد اللي كان جواله مغلق...وبعد ماحكى لابوه كل شي...
ابو خالد:"الله عليه الظاااالم"
خالد:"أي والله يبه...انا من شفته خفت لما تصورت بسمه تتزوجه اشلون هي..."
ابو خالد:"طيب اش قررت"
خالد:"تعبت من التفكير..."
ابو خالد:"اشور عليك..."

[ساهر سات]

خالد:"تفضل يبه ....اسمعك..."
ابو خالد:"شف ياخالد بسمه الله حطها في طريقك...ولما قررت تطلقها الله حنن قلبك عليها ماتدري يمكن الله رايد لك خير..."
خالد:"يمكن....وانا اول ما شفت الرجااال حسيت اني مسؤال عن بسمه ومستحيل اتخلى عنها..."
ابو خالد:"وهذا العشم فيك ياولدي هي مالها ذنب في أي شي..."
خالد:"عشان كذا مانيب مطلق بسمه....وترى موضوع الطلاق مااحد يدري عنه الاانتوا وفهد وعمي ابوفيصل وهم ماراح يتكلمون...عاد انت قول لامي وريم...ينسون الموضوع ولا يخبرون احد..."
ابو خالد:"ريحت قلبي الله يريح قلبك...كنت شايل هم بسمه"
خالد:"لا مستحييييل اللحين اطلقها بس عساني مااظلمها....."

كانت ريم تسمع كل شي وهي منصدمه....كان ودها تطلع وتعارضهم بس عارفه ان ابوها وخالد رح يعصبون عليها...راحت غرفتها...وشافت التلفون...وحت انه من واجبهاتخبر عبير بكل اللي صار....ومثل ما سمعت ظحكتها وحست بفرحها في الاول سمعت بكاها...وحست بحزنها وغضبها في نفس الوقت...وسمعت سبها وتهديدها لبسمه وحسرتها على حبيب القلب خالد.....

************

انتهى الموضوع ومر على انتهائه شهر وما درت بسمه باللي كان يخطط له خالد...
كانت ملتهيه في الامتحانات واللي مرت على بسمه ببطئ شديد كانت في قمة الاجهاد والتعب على الرغم من التحسن النسبي لمعاماة عمها واهله لها…...
بس كان هم الامتحانات وهم حياه جديده هي مقبله عليها ….ماخذ كل تفكيرها …وزاد التوتر يوم اعلان النتائج واللي كانت تتمنى تجيب نسبه عشان تكمل في الجامعه ...وما خاب ظنها نجحت وجابت نسبة تأهلها لدخول الجامعه ...
وكانت خلصت من التسوق اللي حاولت تقتصد قدر الامكان لان المبلغ اللي وفره عمها لها مهو اللي في بالها بس مستحيل كانت تطلب غيره ... قسمت وقت التسوق
قبل الامتحانات وبعدها لانها في الامتحانات ماكانت تروح واللي يقوم بالمهمه عنها سحر ....ولما راحت بروفة الفستان كان روعه وزي ماتمنته ...
انتهت من هم الامتحانات وهم اغراض العرس وبغى هم حياه جديده مسيطر على تفكيرها .....

***********

من جهه ثانيه كان ابو خالد مشغول بتجهيز لليلة العرس اللي من فرحته بولده رفض ان احد يقوم بها غيره وكان يتدخل في كل التفاصيل ...يبغى تكون ليلة زواج خالد ليله مميزه عند الكل مثل ماهي مميزه عنده...
وكان خالد خلص تجيهز االقسم اللي بيسكن فيه عند اهله ...وكان عباره عن غرفةنوم واسعه وصاله ومكتب ... وكان يحاول يجاري اللي حوله في فرحتهم ...وقرر انه يحاول ينسى عبير....

***********

كانت مستسلمه للكوفيره وهي تنهي لمساتها الاخيره....لما خلصت كانت قمه في الجمال
والنعومه...كان رافعه شعرها على فوق ومنزله على وجهها خصل بسيطه وكان مكياجها ناااعم... طلع شكلها مع الطرحه والفستان الابيض قمه في البرأه والنعومه...
سحر :"الله ...يابسمه انتي حلوه بس اليوم شكل ثاني ...تصدقين اخاف على المعرس يصير فيه شي .."
بسمه وهي تحط يدها على قلبها : "خافي علي انا ...احس من كثر دقات قلبي بيوقف "
سحر :" بسم الله عليك ...(وهي تبتسم )الله يسعدك يابسمه .."
بسمه:"خاااايفه ياسحر"
سحر قربت من بسمه ورفعت وحهها :"حاولي تنسين الخوف وتأكدي ان هذي احلى ليله في حياتك..."
بسمه:"مو بيدي..."
سحر:"صدقيني ما كذب من سماها ليلة عمر....بس ماتعرفين قدرها الااذا مرت...بس ذكرياتها تبقى طول العمر..."
بسمه:"هي اكيد بتبقى بس هل بتكون ذكريات سعيده ولا تعيسه"
سحر:"اشفيك متشائمه كذا...."
بسمه:"مادري....احس اني موطبيعيه...صح"
سحر:"خلي عنك الدلع....يااحلى بسمه"
بسمه تبتسم ابتسامة امتنان وهي تطالع بنت عمها :"تصدقين ياسحر لو عندي اخت ماحبيتها كثرك ومستحيل انسى كل اللي سويته عشاني "
سحر : "عيب عليك هالكلام ...وبعدين استعدي في مفاجأه لك...بس لحظه"
وفتحت الباب واول ما شافت بسمه اللي دخلت ما قدرت تتحكم في نفسها وراحت تركض ورمت نفسها في حظنها ....
بسمه وهي تحاول تمنع دموعها لا تنزل :" خااااااالتي مريم "
مريم :"تتوقعين ادري عن هاليوم مااجي "
بسمه : "اشلون دريتي "
مريم :" وهي تناظر سحر اللي كانت طالعه :ما قصرت سحر"
بسمه : "ماني مصدقه عيوني "
مريم :" الله يسامح عمك اللي حرمني منك ...امسحي دموعك لايخترب مكياجك "
بسمه وهي تمسح دموعها :" عسى ما تعبتوا من الطريق"
مريم وهي تضحك :" اللي يسمعك يقول جاين من اخر الدنيا ...مهو في الخرج مابينها وبين الرياض الا 80كيلو"
بسمه :" هههه لا تلوميني ياخالتي "
مريم :" هههه مالومك اليوم اكيد حالتك حاله (وهي تطالعها بحنان)...فرحت لك يابسمه من قلبي بالذات ان الكل يمدح في العريس واهله"

مريم هي خالة بسمه الوحيده وتصير امها من الرضاعه...عندها من العيال تركي 24سنه وخاطب بنت عمه...وفواز 20سنه وهو اللي رضعت معه بسمه...وطلال عمره 18سنه وهو اكثر واحد يحب يناقر بسمه...واخر العنقود الجوهره 9سنين واللي جت في الوقت الضايع على قولت طلال...

[ساهر سات]

كانت عبير مع ريم اللي ميته قهر وتحاول تظهر قدام الناس عاديه ...وهي من داخل ميته قهر
ريم :" صعب اللي تطبينه..."
عبير : "لازم فيه طريقه "
ريم :"اخاف احد ينتبه "
عبير :"الله يخليك لازم اشوفه "
ريم :" انتي ادرى بخالد اصلا من يشوفك كذا بيطلع"
عبير :" انا بطلع بعباتي كأني طالعه وقاعده ادورك "
ريم :"بس لو يحس انك قاصده تشوفينه ....ان ينقلب حبه لك احتقار"
عبير بضيق :" انتي ما عليك ...سوي اللي اقوله وبس "
ريم :" اوكيه بس انتي اللي تتحملين النتائج "
عبير :" مواااافقه"
ريم:"بصرااااحه ياقواتك...انا لو مكانك مااجي"
عبير وهي في خاطرها مستحيل مااجي...لازم ادمر حياة بسمه...
وتنهدت وهي تذكر كيف ان خالد رفض عرض ابوها عشان بسمه...

************

-مبروك ياعريس ...
صدع راسه من الرد على هالكلمه ... من كثر ما سمعها اليوم ...
فهد :" اشفيك يالحبيب سرحان "
خالد بضيق :" افكر "
فهد:"الليله بالذات لا تفكر...."
خالد بضيق:"يااخي احس اني معصب وكرهت كلمة مبروك..."
فهد:"باين عليك يااخي ابتسم شوي..."
خالد:"اه....يافهد لو تدري باللي بقلبي"
فهد:"ماادري باللي بقلبك ولا ودي ادري..."
خالد:"الشره علي اللي يعطيك وجه..."
فهد :"لا تعطيني وجه اذا بتقعد تشكي....بس بغيت اسألك من الشباب اللي تو يسلمون عليك"
خالد :"سلمت اليوم على اشكال والوان "
فهد :" طالعهم اللي قاعدين يسلمون على ابوك "
خالد : "ايه ...ذولي عيال خالة بسمه ...واخوانها من الرضاع "
فهد :" يعني لها محارم غير عمها اللي ما حبيته "
خالد وهو سرحان :" ايه "
فهد:"تصدق حلو اسمها"
خالد:"من اللي حلو اسمها..."
فهد:"مرتك..."
خالد:"فهد...."
فهد :"اقول خالد احسك سرحان واخاف اذا دخلت ترتبك اشرايك ادخل معك عشان"
خالد يقاطعه :" لا استريح انت ...ما ابغى اتعبك "
فهد :" تعبك راحه"
خالد :"وبعدين ماني داخل عند الحريم بس بدخل اسلم على خواتي وامي من غير امر على الحريم"
فهد : "حتى ولو ادخل معك خواتك خواتي و... (ولما شاف نظرة خالد له )عموما اذا احتجتني تراني تحت الخدمه"
خالد : "ههههههه الله لا يحوجني لخدماتك اذا كانت كذا "

***************************

دخلت بسمه على الحريم على اضائه خافته ... والكل انبهر من جمالها ....وكانت تمشي وهي تحاول تخفي ارتباكها وخوفها خلف ابتسامه خجوله رسمتها بصعوبه على وجهها
وكان الحريم في تعليقاتهم اللي تقول هي احلى من عبير.... واللي تقول لا عبير احلى
لان الكل تقريبا يدري عن سالفتهم ...
كانت فيه عيون تتطالعها بحقد وحسد ويتمنون لها كل شر......... اولهم عبير اللي تشوف فيها اللي خطفت منها حبيبها ...ومرة عمها وبناتها هند وهدى كانو يحسون بغيره منها انها اخيرا بتتزوج زوج ما كانت تحلم فيه.........
وكان فيه عيون تتمنى لها السعاده اولهم بدريه وهي تدعي ربها انها ما تكون ظلمت بسمه او خالد لانها السبب في هالزواج ...
اول ما جلست ...كل اللي يحبونها جوا حولها ...
امل : "مبروك ياحلى عروس"
بسمه : "انتي لا تكلميني "
امل :" ليه "
بسمه :" قاعده منطقه داخل لوحدي لو.... مو سحر تطل علي كان مت زهق "
امل : "عاد تدرين اذا ما قمت بعرسك اقوم بعرس مين "
بسمه :" هذا هو السبب "
امل :" وتدرين بعد الواحد وهو متكشخ يبغي يظهر قدام الناس يمكن الله يرزقني بعريس
عليه القيمه "
بسمه :" الحين صدقتك "
دلال :" ما توقعت يابسمه تمشين بهالهدوء ...( هي تكلمها في اذنها ) اللي يشوفك يقول بتنزف على واحد بينهم قصة حب عظيمه "
بسمه :"حاولت ابين طبيعيه ...لا اشمت بعض الناس بارتباكي "
امل وهي تقاطعها : "ياحلو بنت خالتك ...كل شوي وهي ترقص ...تصدقين تشبهك "
ابتسمت بسمه وهي تناظر بنت خالتها...
دلال :" اكيد فرحتي يوم شفتي خالتك"
بسمه : "هي الحاجه الوحيد اللي فرحت قلبي"
امل :"الفرحه الكبير لما تشوفين بعض الناس "
بسمه:"لا تذكريني الله يخليك..."
امل:"ايه ...الحين لاتذكريني لكن بعدين الله العالم"
ماردت عليها ... وانتبهت لمرة عمها :"اقول امل من اللي قاعده مع مرة عمي "
امل : "هذي الله يسلمك ام عبير ...ينطبق عليه المثل الطيور على اشكالها تقع"

[ساهر سات]

بعد ما دخلت بسمه كانوا صديقاتها معها بعدين طلعوا لان ريم قالت لامل تطلعهم لان خالد وعيال خالة بسمه بيدخلون ... وطلبت منها تقول لخواتها لا يدخلون الين تتأكد ان خالد لوحده...وكانت بسمه في الغرفه لوحدها ومقفل الباب عليها ...اتصلت ريم في خالد وقالت له يدخل ...وكان عقب بيدخل ابوه وعم ريم وعيال خالتها...
اول ما دخل لقى صاله وفي بابين مقفله مادرى وين يدخل رفع الجوال بيكلم ريم لما سمع صوتها ...
عبير :" ريم ..."
التفت على الصوت وشافها اول ما تاكدت انه شافها غطت نص وجهها بطرحتها...هو عرفها على طول مستحيل ينسى الوجه اللي محفور في عقله لانه شافها مره وحده لما خطبها ....غيرانها كانت تتعمد وهي في بيتهم تطلع في وجهه وتسوي نفسها مو داريه عنه....
عبير بارتباك مصطنع::خاااااالد :
خالد:............
عبير بنبرة حزن:: مبروك ياخالد:
خالد بضيق:"الله يبارك فيك"
عبير: "حراااام اللي صار فينا"
خالد وهوناسي هو وين بس المهم ان عبيرقدامه:"ابوك السبب والظاهر حتى انتي طاوعتيه في اول خطيب لك"...
عبير وهي تصيح:"حرااااام عليك ياخالد حتى انت ما قدرت تقاوم الحاح اهلك لزواج وانت رجال....اشلون انا اقدر كنت مجبوره ويوم انتصرت على اهلي فات الاوان"
خالد :" لا تصحين ياعبير"
ماردت عليه...
خالد:" دموعك غاليه علي "
عبير :" ما جفت دموعي ياخالد من يوم صرت لغيري ...ياليتني مت ولا جا هاليوم "
خالد بعطف :"لا تدعين على نفسك ياعبير"
عبير :" ليه اهمك"
خالد بتهور : "انتي تدرين انك تهميني و ماحبيت ولا بحب احد غيرك "
يسمع صوت من وراه...-"وليه ماتزوجتها ما دام ما حبيت غيرها"
خالد حس موقفه صعب وانعقد لسانه ما قدر يتكلم
عبير وهي تخفي ابتسامة نصر :" بسمه..........."
بسمه وهي تحاول تخفي دوعها وتظهر متماسكه ردت عليها باحتقار:" ايه... بسمه"
عبير :" اسفه خالد ما كان قصدي "
وطلعت وهي تركض وتعمدت توجه كلامها لخالد ...دخلت بسمه الغرفه وتنسندت على الباب وما قدرت تتحكم في دموعها اكثر ...حست في خالد وهو يفتح الباب فابتعدت عنه
وادارت له ظهرها .........

--------------------------------------------------------------------------------

[ساهر سات]

دخل خالد وهو متندم....وهو يشوف بسمه اللي معطيته ظهرها مهو عارف اش يقول او كيف يتأسف وهوغلط غلطه ما تغتفر ...حس انه لازم يتكلم ويهديها قبل مايدخل ابوها وعيال خالتها...
خالد :" بسمه انا اسف ..."
ماردت عليه...
خالد:"والله اسف واللي صار غصب عني"
بسمه وهي تشهق من الصياح :" وليش تتأسف ...عادي واحد وشاف حبيبة قلبه ليش يهتم في غيره "
خالد :" ماكان ودي اجرحك ...بس "
بسمه :" انت مو جرحتني انت ....انت طعنتني ...انت ذبحتني ياخالد ومارحمتني"
تندم خالد زود وهو يشوفها شبه منهاره تنهد :"طيب حاولي تهدين "
التفتت بسمه عليه وهي تناظره من بين دموعها :"خالد انت ليه تزوجتني "
خالد بضيق:" يعني ليه تزوجتك "
بسمه تبغى تجرحه مثل ماجرحها :" انت لو رجال ما تزوجت بهالطريقه "
عصب خالد وقرب منهامسك يدها بقسوه:" رجال غصبا عليك ...تدرين احسن انك شفتي كل شي بعيونك بكذا تريحيني ما امثل دورالزوج العاشق الولهان ..."
بسمه بتحد وهي تحاول تخفي صدمتها من كلامه:" وانا ارتحت من تمثيل دور الزوجه المحبه المطيعه"
فك يده بعد ما سمع حس برى :" اجلي هالموضوع لبعدين... مو زين يدخلون ويشوفون شكلك كذا "
بسمه :"ليه مو عاجبك شكلي "
خالد وهو طالع :" ناظري المرايه "
بعد ما طلع حطت وجهها بين يدينها وهي تصيح... حاولت تتمالك نفسها ناظرت وجهها في المرايه كانت عيونها حمر ومكياجهها اخترب كانت لازم تعدله وتبان قدام الكل طبيعيه....

**********

طلعت لهم وهي تحاول تكون طبيعيه وسلمت على الجميع والكل بارك لها عمها وابو خالد وعيال خالتها.... كانت برغم اللي فيها ما تنكر الفرح اللي حسته يوم شافت عيال خالتها شافت فيهم ايام الطفوله وذكروها باخوها بندر ودمعت عينها يوم تذكرته وتذكرت اهلها اكيد ماكان هذا وضعها لوكانوا معها...ناظرت عمها وهي تشوفه يسولف مع ابو خالد ويوصي خالد عليها وفي خاطره انت ياعمي سبب اللي انا فيه.... طلع عمها وابو خالد وقعدوا عيال خالتها....
فواز:"فيه عروسه هالايام تصيح في احلى ليله في عمرها"
مسحت دمعتها وقالت في خاطرها وانت الصادق اتعس ليله في عمري ...
طلال يبغى يخليها تبتسم:" اش صار ماكنتي من اول حلوه....الحين قمر "
فواز:" بسمه من يومها حلوه ..ولا اشرايك ياخالد"
خالد:" انا شهادتي مجروحه في بسمه.".
بسمه في خاطرها.... يازينك ساكت....
تركي:" امك داعيه لك ياخالد يوم اخذت بسمه ...(وهويناظر بسمه بحنان)بسمه كامله والكامل وجهه"
خالد :"تقول لي عن بسمه..."
دخلت خالة بسمه والجوهره وسلمت على خالد وباركت له ...
فواز:" خالد من تشبه الجوهره اختي "
ناظر خالد البنيه الصغيره كانت نسخه مصغره من بسمه ...
ابتسم خالد :" تشبه بسمه "
فواز وهو يكلم اخته :"شوفي اذا كبرتي بتصيرين عروس حلوة زي بسمه "
الجوهره بكل برأة الطفوله :"وابغى اتزوج واحد حلو زي خالد"
الكل انفجر في الضحك الابسمه اللي اكتفت بابتسامة....وفي خاطرها الله لايخليك تشوفين اللي شفته... وجلسوا يسولفون مع بسمه اللي ما اخفت فرحتها بوجودهم وحس خالد ان لهم معزه في قلب بسمه ...
قاموا تركي واخوانه بيطلعون بعد مااخذوا من خالد وعد بزيارتهم ....ودخلت ام خالد وبناتها واختها....كان خالد يسولف مع خواته وهو يختلس النظر لبسمه اللي كانت تسولف مع خالتها وقدرت تتمالك نفسها ولا كأن شي صار ...
حتى جا الوقت اللي قامت خالتها بتروح وهي تسلم على بسمه ما قدرت تتماسك وانهارت على كتف خالتها وهي تبكي كانت تبكي تحطم امالها وانهيار حياه ما بدتها..
لما شافها خالد تندم على اللي صاروحس بتأنيب الضمير ...
مريم :" اهدي يابسمه "
وقربت منها بدريه :" بسمه اشفيك"
حست بسمه انها زودتها شوي مسحت دموعها :" مافيني شي بس تذكرت امي تمنيتها بجنبي اليوم "
مريم :"يابعد عمري يابسمه....(وهي توجه كلامه لخالد)ما اوصيك على بسمه ياخالد "
خالد :"بسمه في عيوني "
وطلعت خالتها.... وبسمه من كثر الدموع المتجمعه في عيونها حاسه ضباب قدام عيونها ...
ام محمد :" اشفيها مرتك ياخالد ما وقفت صياح ياكافي"(تتعمد توجه الحديث لخالد وكان بسمه ماهي موجوده)
خالد وهويناظر بسمه:" تدرين بعد عروس"
مسحت بسمه دوعها وانقهرت من خالته اللي حتى مبروك ما سمعتها منها ...والتفتت على امل تسولف معها ...وكان حالها احسن وتطمنت بدريه وقالت اكيد صياحها علشان خالتها اللي ما شافتها من زمان ....
وقف خالد ومسك بيد بسمه الين وقفت اللي تضايقت من لمست يده بس لازم تصبر ...
خالد :" اشوفكم ما تنعطون وجه ....شكلكم راعين طويله "
وحط يده من ورى ظهرها وهم طالعين:"ما كنكم قاعدين مع عرسان "
بسمه في خاطرها لو ماسمعت كل شي كا ن صدقتك ياخالد من كثر ما انت تتقن الدور........

[ساهر سات]

وهي قاعده مع ريم بعد ما راح اغلب المعازيم وخالد وبسمه طلعوا....كانت تبتسم ابتسامة رضى كانت السعاده تبان على وجهها بعكس اول ما وصلت الزواج وتفكر بكل اللي صار....
ريم:" ارتحتي الحين"
عبير وهي تفكر:" ايه...ارتحت"
ريم:" شفتي خالد"
عبير:" ايه شفته"
ريم:" ترى بديت اعصب.... كل ماسالت (جاوبتي هي تقلدها) ايييييييييييه"
عبير:" اشتبيني...ارد"
ريم:" اللهم طولك ياروح...اش صاار لما شاف طلتك البهيه"
عبير:"ما صار شي وبعدين لا تصيرين ملقوفه"
ريم: "الحين صرت ملقوفه"
ماردت عليها عبير وراحت تفكر وهي تبتسم الحين بدت اول خطوه للانتقام من بسمه وزرعت الشك في نفسها.....وتاكدت ان خالد لازال يحبها....

^^^^^^^^^^^^^^^^^^^^

اول ما دخلت الجناح ما استغربت لما شافته بقمة الفخامه ولو كانت في ظروف احسن
او كانت مثل أي عروس ما يعكر ليلتها الا الحيا والخوف من حياه جديده....كان اعجبت به....لانها ماعمرها شافت شي بهالفخامه....بس اللي صار خلى الافكارتتضارب في راسها وكانت تحس بدوار...وجلست على اول كنبه شافتها ....حاولت تتمالك نفسها وما تصيح قدامه...كفايه الدموع اللي نزلت قدامه...
انتبه خالد لها:"بسمه انتي تعبانه"
بسمه وهي تحاول تبان طبيعيه:"لاااااااا"
خالد:"اشوفك الحين هديتي واقدراتكلم معك بهدوء"
سكتت بسمه وهي تبتسم بمراره........
خالد:"بسمه انا اسف"
بسمه:" مافيه داعي للاسف"
خالد:"ادري ان اللي صار غلط"
بسمه وهي تقاطعه:"وشو الغلط زواجك مني.... ولا تغزلك في حبيبتك في ليلة عرسك"
خالد تنهد:" اللي صارانتهى... فلا تحملين الموضوع اكثر مما يحتمل"
بسمه:"انتهى ماظنتي.... بينتهي بسهوله"
خالد:" يابنت الناس.... الموقف كان بصدفه"
بسمه وهي تبتسم بسخريه:"يقولون رب صدفة خير من الف ميعاد....بس ياليت ميعادكم كان في زمان ومكان غير"
خالد وهومعصب:"تراك زهقتيني انتي اش تبغين"
بسمه وهي تتصنع البرود:: ماابغى منك شي"
خالد بعصبيه:"كيفك انتي الخسرانه"
ماردت عليه ووقفت تبغى تروح الغرفه بس حست بكل شي يدور حولها....تذكرت انها مااكلت شي من الصبح...انتبه خالد وسندها قبل ما تطيح وتمسكت فيه بقوه حتى حست انها قادره تسند عمرها وابتعدت عنه...
خالد:" خليني اوصلك داخل"
بسمه:"لا......"
وما انتظرت رده....دخلت الغرفه وقفلت الباب وراهاوكانت الغرفه روعه...كان السرير باعمده فخمه....ومنتشر على السرير اوراق ورد طبيعي بالوان جميله...جلست شوي حتىتتمالك نفسها....وقت ماحست نفسها احسن فتحت شنطتها واخذت القميص اللي حسته اكثر حشمه من غيره....ودخلت الحمام حست انها ارتاحت لما تسبحت...
بعد ماطلعت من الحمام سمعت خالد يطق الباب وفتحت الباب....تفاجأخالد لما شافها لابسه قميص حريري وردي وشعرها مبلول....كانت قمه في النعومه والبرأه....استحت لما شافت نظراته المتفحصه لها...
خالد:"اشلونك الحين ان شاء الله احسن"
بسمه:ايه ارتحت شوي"
خالد:" بغيت شنطتي"
بسمه:"اوكيه انا طالعه الصاله حتى تاخذ راحتك"
وطلعت بسمه وشغلت التلفزيون......حطته على مسرحيه وهي تناظر الجمهور اللي يضحك تقول ياحظهم اللي قادرين يضحكون....حتى الضحك ماتحس بقدره الا اذا انحرمت منه...
بعد ما خلص خالد جلس قريب منها:"تعشيتي"
بسمه:"مالي نفس"
خالد:" اكيد الدوخه اللي تو لانك ماكلتي شي من الصبح"
بسمه: "مابغى...نفسي مسدوده عن الاكل"
خالد:" كيفك"
بسمه وهي قايمه:"انا باخذ مخده ولحاف وبنام في الصاله."
خالد:"لا نامي داخل.....انا بنام في الصاله"
راحت بسمه الغرفه وجابت مخده ولحاف وحطتها على الكنبه ودخلت وما كلمته وهوما حاول يكلمها...
اول ما دخلت رمت نفسها على السرير وانفجرت في نوبة بكاء وحاولت تكتم صوتها قدر الامكان حتى ما يسمعه خالد...حقدت على عبير و خالد وكرهت عمها اللي تعتبره المسؤل الاول عن كل شي...هي كانت عارفه ان خالد يحب بنت خالته....بس كانت تتأمل انه نسى هالحب اوانها بتقدرتنسيه حب بنت خالته...لكن اخر شي فكرت فيه انها تسمع وفي ليلة زواجها خالد يصرح بحبها....حطمها وجرحها هالشي...حاولت اول ماسمعته انه ماتطلع وتسوي نفسها ماسمعت شي لكن كرامتها المهدوره وجرحها العميق خلاها تطلع وتواجههم...
خافت من مستقبلها مع خالد وطرى على بالها ان خالد ممكن يطلقها خافت من هالفكره...لو كان البيت اللي بترجع له مطلقه غير بيت عمها كان يمكن تقبلت فكرة الطلاق...

[ساهر سات]

وفي الصاله كان خالد...يفكر في عبير ...وابتسم لما تذكرها بس لام نفسه على تهوره لانه لما شاف دموع عبير...ضعف قدامه وقال كلام كان المفروض يظل محبوس في قلبه وماحد يدري عنه..... وندم على اللي صار خصوصا وهويسمع بكى بسمه المكتوم
كانت مشاعره متضاربه بين حبه لعبير....وشعور يحسه ناحية بسمه مايدري هو عطف ولا شفقه ولا له اسم ثاني.....

**********

وفتحت عيونها...اللي ماغفت الابعد ماصلت الفجر وحست بخالد لما دخل الحمام يتوضا بس سوت نفسها نايمه...حست بالم في قلبها وهي تتذكر كل اللي صارفي اللي يسمونها ليلة العمر واللي كانت بالنسبه لها ليلة الصدمه...ناظرت الساعه كانت الساعه عشر...حست بجوع...وفتحت الثلاجه وكل اللي موجود اشياء ماتقدر تاكلها ومعدتها فاضيه...فتحت الباب وناظرت خالد اللي كان نايم ومعطيها ظهره وشافت صحن فاكهه وراحت بتاخذ تفاحه...
خالد وهولازال معطيها ظهره:"طلبت فطور الحين بيجي"
تفاجأت لما درت انه صاحي وتركت التفاحه وهي راجعه الغرفه:"مالي نفس"
التفت خالد عليها:" اتركي العناد ترى ما بتعاقبين الانفسك"

--------------------------------------------------------------------------------

**حزن السنين**
26-05-2006, 05:29 am
بسمه:"كيفي نفسي وانا حره فيها"
ودخلت الغرفه وماانتظرت رده لها وسمعت صوت معدتها من الجوع وتذكرت انها مااخذت التفاحه...بعد فتره بسيطه...
فتح خالد الباب بعصبيه:" تعالي ابغى اكلمك"
خافت لما شافته ورجعت فكرة الطلاق طرت على بالها....نست الم الجوع وحست بالم في صدرها...توكلت على ربها وطلعت وراه...
لقت الفطور على الطاوله قدامه...
بسمه:"خير"
خالد:"قعدي اول فطري"
بسمه:" ماني مشتهيه"
خالد وهويمد كوب الحليب:"اشربي الحليب اقل شي"
اخذت بسمه الحليب من يده وجلست....كان يفطر وهويناظر التلفزيون ولا كانها موجوده...لما شافته مو منتبه لها اخذت كورسان واكلته وهي تشرب الحليب...
وبعد ماخلص من الفطور انتظرت يتكلم..لما شافته طول وما كلمها....
بسمه:"اش الموضوع اللي بغيت تكلمني فيه"

[ساهر سات]

خالد ببرود:"موضوع ؟؟؟"
بسمه بضيق:"اللي ناديتني علشانه"
خالد:"ناديتك علشان تفطرين"
عصبت منه وقامت بتدخا الغرفه....
لما شافها قايمه بتدخل الغرفه:"لحظه شوي ...تذكرت اش بغيت منك"
جلست ودقات قلبها تزيدوهي في خاطرها الله يستر..
خالد بجديه:" الحين اللي صار صار وانتهي اذابتستمرين زعلانه كيفك بس انا احذرك(دقات قلبها زادت لايكون بيقول اللي اتوقعه) لو تبينين شي قدام اهلي....خلنا نظهر قدامهم طبيعين جدا......الين نشوف حل"
ارتاحت بسمه بس خافت من الحل اللي بيشوفه....
بسمه:" اوامر ثانيه"
خالد:"ايه انا حاجز بكره نسافر لشهر العسل"
بسمه:"بس انا ماابغى"
خالد بضيق:"انتي لازم تعانديني في كل شي اقوله....ترى شهر العسل مو عشانك انا يهمني يبان الزواج قدام اهلي طبيعي.... وبيستغربون جدا اذا ماسافرت"
بسمه:دور لك عذر مقنع وقوله لاهلك......بعدين انا لازم اسجل في الجامعه خلال هالاسبوعين"
خالد:"الجامعه لاحقه عليها..."
بسمه بعصبيه:"لا...مو لاحقه عليها...وسفر ياخالد مومسافره"
خالد:"شوفي انا الا العناد ماينفع معي بتروحين غصب عنك..."
بسمه:"تبغاني اترجاك....طيب الله يخليك ماابغى اسافرو..."
وخنقتها العبره وماقدرت تكمل...
خالد وهويتنهد:"من غير صياااح الله يخليك....وليش ماتبغين تروحين..."
سكتت بسمه وهي في خاطرها اش تبغاني اقول اني ماقد طلعت برى ولو تكون اول طلعه لي معك بكون غصب عني محتاجتك وبتكون انت مصدر الامان لي وانا ماابغى هالشي...
خالد لما شافها ماردت ماحب يضغط عليها:"خلاص بدور عذر على قولتك بس نروح مكه اسبوع ونرد"
بسمه:"اللي تشوفه"
خالد:"على فكره...... بيمر ابوي وامي الظهر يسلمون علينا"
ماردت عليه وهي تفكر في كل اللي صار لها....

**********

كانت قاعده مع امها في الصاله تبرد اظافرها وعلى وجهها ابتسامة ارتياح...
وامها قاعده تتأملها ومستغربه حالها من وقت رجعتهم من زواج خالد...كانت تتوقع ترجع منهاره لكن رجعت متماسكه والفرح يطل من عيونها...
عبير:" ما قلتي لي يمه البارح وقت مادخلتوا على خالد ومرته اشلون كانوا"
ام محمد:"خالد كان عادي مثل أي عريس....بس مرته حسيتها مو طبيعيه"
عبيروهي تطالع امها بااهتمام:"اشلون مو طبيعيه..."
ام محمد وهي تفكر:"أي عروس يكون في عيونها فرحه ولو بسيطه...بس هي ما شفت في عيونهاالا الحزن والخوف و..."
عبير:" بس وقت ما انزفت عند الحريم كانت طبيعيه..."
ام محمد:"ايه انتبهت....بس عقب تغير كل شي....ما ادري اش السبب.."
اخفت عبير ابتسامه حتى ما تنتبه امها...وهي تفكر في قوة ملاحظة امها...
.وسرحت في حبيب القلب اللي مستحيل تنساه...

[ساهر سات]

اول مادخلت عليهم سلمت على ابوه وامه واضطرت تجلس مع خالد على نفس الكنبه...
كانت تطالع خالد معطيها ظهره وهو يسولف مع امه وابوه...كان مبين قوة علاقة خالد
معهم...
ابو خالد:" ياولدي ما عليك من اشغال الشركه...العمر يخلص والشغل ما ينتهي"
خالد:"بس يابوي الحين فيه ضغط في الشركه..وبعدين بسمه بتسجل في الجامعه خلال هالاسبوعين"
ابو خالد:"ماعليه اذا على الجامعه ماتجون الا وكل شي منتهي"
خالد:" يابوي انا ما الغيت السفر انا بس اجلت.....واذا شفت كل شي اوكيه سافرت وانا مرتاح اكثر"
ابو خالد:"على راحتك ياولدي...(وهو يناظر بسمه)اذا انت ومرتك متفقين احنا نطلع منها"
حست بسمه انه ينتظر منها اجابه:"ههههه....ولو انت الخير والبركه ياعمي...."
ابو خالد:"الله يسعدكم يابنتي بس كان ودي تسافرون مثل كل العرسان..."
بسمه:"ماعليه مره ثانيه وبعدين احنا بنروح مكه اطهر مكان ممكن يروح له الانسان"
ابو خالد:" صدقتي يابنتي"
واستغربت بسمه من ام خالد اللي بس تسولف مع ولدها ولا تحاول تكلم بسمه الا بكلمات عابره عكس ابو خالد اللي كانت الحنيه تطل من عيونه...وسمعت خالد يخبر اهله انهم بيسافرون مكه اليوم في الليل...
بعد ما طلعوا حست بسمه بالتعب ودخلت الغرفه وحطت راسها على المخده وما وعت الا على المغرب واستغربت كيف قدرت تنام هالوقت كله...
تذكرت انها ما صلت العصر....بعد ماخلصت صلاتها طلعت الصاله مالقت خالد
قعدت وهي تنتظره وحست بخوف لانها عمرها ماقعدت بمكان لوحدها....
سمعت الباب ينفتح....التفتت وشافت خالد....برغم كل اللي بينهم الا انها ارتاحت لما شافته...
خالد:"سلام عليكم..."
بسمه:"وعليكم السلام....متى طلعت؟؟؟"
خالد:"قبل المغرب....ترى بنسافر مكه بعد العشاء ان شاء الله....ط
هزت بسمه راسها ولا كان الموضوع يعنيها.....
خالد ضايقه برودها:"وتوني طلبت اكل....وبتاكلين غصب عنك..."
بسمه:"باكل بس موغصب"
خالد:"بسمه انتي ليش تعانديني..."
بسمه:"انا مااعاند اتكلم عاااااااادي"
خالد:"ايه....واضح"

[ساهر سات]

كانت خايفه ترجع تفاتحها في الموضوع اللي هي رافضته...
وفعلا ما خاب ضنها...
مشاعل:"اشوف في ناس ما يوفون بوعودهم"
ريم:"انت للحين تتذكرين"
مشاعل:"مستحيل انسى....ياللا بدق على رقم شقته"
وما عطتها فرصه ترد عليها....واخذت التلفون ودقت الرقم وناولتها السماعه...
-"الو"
عبير:.......
-"الووووووووووو"
ريم:"مساء الخير"
-"مساء الفل...."
ريم:"لو سمحت ممكن اكلم خلود..."
-"من نقولها..."
ريم:" قولها...صديقتها..."
-"وصديقتها مالها اسم..."
ريم:"مو لازم تعرف اسمهها..."
-"بالعكس لازم اعرف تدرين ليش؟؟؟"
ريم:" ليش...."
-"علشان أي صديقه لخلود تعتبر صديقه لي..."
ريم:"أي صديقه..."
-"ايه.......بس ترى الصداقه شي... واللي حسيته لما سمعت صوتك شي ثاني..."
ريم:"وش اللي حسيته لما سمعت صوتي يابوالعريف..."
-"حسيت صوتك دخل قلبي على طول.."
ريم:"ههههههه من اول مره اش هالمبالغه..."
-"انا ماابالغ...انا اقول الحقيقه..."
ريم:"اقول يابوي الحقيقه...مع السلامه الحين..."
-"لحظه شوي..."
ريم:"خير..."
-"لا تحرمينا من هالصوت..."
ريم:"اكيييييد..."
بعد ما سكرت حست يدها ترتجف واستغربت هالجراءه....
مشاعل:"ههههههههه شفتي الموضوع بمنتهى السهوله..."
ريم وهي متفاجئه:"الحين انتي مو زعلانه لانه كلمني عادي..."
حاولت مشاعل ترقع الموضوع:"انا لما قربت من السماعه سمعت صوته وارتحت لانه موصوت سعود هذا اكيد زميله في الشقه..."
ريم:"انا اقول اشفيها ذي مو زعلانه..."
مشاعل:ط اشرايك....تسليه وسعة صدر...صح.."
ريم:"صح....وتصدقين اصعب خطوه اول خطوه..."
مشاعل:"بس مت ضحك عليك لما قلتي خلود موجوده....ياقدمك الحين البنت تتصل تتكلم بكل جرائه من غير(وهي تقلدها) خلود موجوده..."
طقتها ريم على كتفهها:"يكثر خيري انه طلع مني هالكلمتين..."
مشاعل:"ههههههه...خلاص صيري كلميه ووسعي صدرك بدل هالملل..."
سرحت ريم وهي تفكر في كلام مشاعل وما درت انها تفكر في كلام وحده من شياطين الانس........

**********

امل قاعده مع امها في الصاله ويسولفون عن احداث الزواج....
امل:"الله يمه بسمه طلعت تاخذ العقل..."
ماردت بدريه لانها سرحت...
امل:"اشفيك يمه سرحتي وانا توني كنت اسولف معك...."
بدريه:"ها...كنت افكر في بسمه ما تحسين امس انها صاحت كثير"
امل:"لاااا...بس هي كانت خايفه شوي...."
بدريه:"يمكن..."
امل:"شفتي عبير....مااقواها....انا لو مكانها مااحظر..."
بدريه:"اكيد انها كانت متوقعه خالد يدخل وبغت تروح تسلم عليه...تدرين وقحه...ومالقت احد يربيها..."
امل:"ياكرهي لها...تصدقين حتى صديقاتي يسألون من هالحلوه..."
بدريه:"يامل فيه ناس ربك يعطيه نعمة الجماااال بس مايصونها وعبير من هالناس...مااقول الا الله يهديها..."
امل وهي ترفع يدها:"الا قولي الله ياخذها ويريح البلاد والعباد منها..."
بدريه بضيق:"انتي اللحين دعيتي ليه مادعيتي ربك يهديها احسن..."
امل :"مااحبهاااا"

************

[ساهر سات]

اول ماركبوا السياره كانت سرحانه....وتناظر خالد اللي يسوق وهو ساكت لما انتبهت حس انه مورايح جهة االمطار...
بسمه: " الساعه كم الرحله... "
خالد: " رايحين سياره... "
بسمه وهي منصدمه: "سيااااااااره... "
خالد: "ايه سياره....ليه ماتحبين السفر بر... "
بسمه: "لا.... بس... "
خالد: "بس شو... "
سكتت بسمه وماردت....وخالد ماحب يعيد سؤاله مره ثانيه...
بعد فتره من مشوا زهق خالد حاول بسولف...
خالد: "بسمه اشرايك نسولف شوي خلينا نقطع الطريق... "
بسمه: "سولف مااحد مانعك... "
حس خالد باحباط بس مايأس: "متى اخر مره سافرتي بر؟؟ "
سكتت وما ردت حتى ظن خالد انها مابترد وحقد عليها في نفسه...
بسمه: "من سبع سنين... "
حست بدموعها تتجمع في عيونها...وانها مخنوقه وماهي قادره تكتم اللي في قلبها حست انها تبغى تتكلم حتى لو ماسمعها احد....
بسمه:"سافرت لمكه مع وامي وابوي واخوي...وجلسنا فيها اسبوع...انبسطنا فيها ومرينا الطايف وجلسنا ثلاثة ايام....بعدين مشينا من الطايف في الليل مثل هالوقت....كنت انا نايمه ورى انا وبندراخوي...صحيت على صوت انفجار الكفره...وشفت ابوي يحاول يتحكم في السياره....بعدها اغمى علي وما وعيت الا والسياره منقلبه وما اسمع الا صوت الرعد والمطر اللي كان شديد...حاولت اصحي بندر مارد رحت لامي وابوي مااحد ردعلي...جلست بجنب امي ورميت نفسي على صدرها وحطيت يدها ورى ظهري بس حسيت بحضن امي بااااارد وصدرها ما فيه حياه....لما فقدت الامل يردون طلعت برى في المطر اللي خف شوي كانت السيارات الماره قليله كنت اتمنى احد يوقف...
ولما امل وافقد الامل من احد يوقف...ارجع السياره واحاول اطلعهم من السياره يمكن من المطر يصحون مااقدر..... اكلمهم مااحد يرد....
طول ماانا في السياره كنت اقول اكيد نايمين وبيصحون رغم الدم اللي كان على وجوههم...
قعدت متكومه على نفسي بكيت حتى جفت دموعي قلت الحين ابوي بيسمع صوتي ويضمني لصدره.... اول واحد وقف لنا كان على طلوع الفجر...
شفتهم يشيلون اهلي ويهزون روسهم.... ويناظروني بنظرات شفقه صرخت.... بكيت.... ناديت امي وابوي....قالت لهم اعرف ابوي وامي يخافون علي وماراح يخلوني لوحدي...بندر الحين بيصحى وبيشدني من شعري ويقول ليش تطلعين قدام رجال...من كثر ما بكيت كنت ايام العزاء مذهوله....و دموعي تحجرت في عيوني....تمنيت احد منهم بقى معي والا انا رحت معاهم...."

خالد كره نفسه على سؤاله الغبي....
تنهد خالد:" كل انسان له يوم يابسمه......وفيه حديث لرسول صلى الله عليه وسلم (ينقطع عمل ابن آدم الامن ثلاث....ذكر منها ولد صالح يدعو له)....واهلك احوج ما يكون لدعاك لهم....."
هزت راسها:" الله يرحمهم...بس شعور صعب انه فجأه يختفي كل اللي تحبهم من حياتك..."
مد خالد ومسك يدها....وشد عليها ماحاولت تسحب يدها....
خالد:" اسف يابسمه...قلبت عليك المواجع..."
بسمه وهي تمسح دموعها:لا بالعكس....انا كاني كنت مخنوقه وارتحت الحين...تصدق اول مره اتكلم عن تفاصيل الحادث...يمكن لاني تذكرته من الطريق...
ركز خالد انتباه على الطريق وتذكر كلام بدريه...لما قالت انها عايشه انواع المآسي...
انتبه....ان بسمه غفت وكانت كل شوي تفز وتناظر الطريق وترجع تغمض عيونها...
تنهد وهوفي خاطره عسى ما اكون انا مأساه جديده في حياتك يابسمه....

--------------------------------------------------------------------------------